A përfitoi Edison Pula nga pakujdesia e efektivëve të policisë apo ata e lanë të arratisej? Ka dyshime të forta se njëri prej efektivëve kishte njohje me 21 vjeçarin e arratisur dhe gjithçka mund të ketë qenë e qëllimshme. Ky dyshim përforcohet edhe nga fakti se efektivi i ndaluar, Naim Stafuka, është vëllai i Enver Stafukës (i cili u rrëmbye dhe rezulton i zhdukur pak kohë pas vrasjes së komisarit Dritan Lamaj). Ky i fundit njihej si mik i të arrestuarit të dy ditëve më parë, Edison Pula.
“Kemi arsye të forta të mendojmë se dy efektivat e patrullës dhe shefi i tyre kanë bashkëpunuar me Edison Pulën, i cili u arrestua pak orë më parë me tetë persona të tjerë në një superaksion policor. Na rezulton se Pula ka mundur të arratiset mjaft lehtë, nëpërmjet derës kryesore që ishte e hapur, pasi u fut furgoni me të cilin transportohej i arrestuari me disa precedentë penalë”, bëri të ditur Policia, raporton Panorama.
Mësohet se dy efektivët kanë mohuar implikimin dhe kanë theksuar se janë gjendur në befasi pasi nuk e mendonin se i arrestuari do t’u arratisej.
“Ishim futur në ambientet e brendshme të komisariatit dhe në momentin që do ta zbrisnim nga makina për ta futur në dhomat e izolimit, ai na shtyu dhe u largua me shpejtësi. Tentuam ta kapnim, por kapërceu murin dhe humbi në qytet”, kanë pohuar efektivët e arrestuar mesditën e djeshme nga SHCBA.
Me gjithë kërkimet e Policisë, Pula vijon të jetë në liri. Blutë kanë kontrolluar rreth 20 banesa, ku dyshohet se ai mund të strehohet, por nuk ka asnjë gjurmë të tij.
