Forcat Speciale ushtruan mëngjesin e djeshëm kontrolle të befasishme në banesat e tri gjyqtarëve të Apelit, që votuan pro vendimit për gjykim të shkurtuar për Dritan Dajtin. Kontrollet u ushtruan në banesat e gjyqtarëve Skëndër Damini, Aleks Nikolla dhe Petrit Aliaj.
Por nëse dy të parët u gjendën në banesë, nuk ka ende informacione për vendndodhjen e gjyqtarit Aliaj. Të afërm të tij kanë thënë për Policinë se gjyqtari Aliaj është larguar drejt Greqisë. Ky largim në momentin kur vendimi në favor të dënimit me 25 vite burgim të Dritan Dajtit ka marrë trajtën e një skandali, lë shumë hije dyshimi.
Për më shumë kur gjyqtari nuk ka lënë një adresë të saktë, ndërsa zyra e tij në Gjykatën e Apelit në Vlorë qëndron e mbyllur. Largimi i gjyqtarit Aliaj pikërisht në momentin e furtunës, i përngjason shumë rasteve të ngjashme të zyrtarëve të cilët i janë shmangur drejtësisë.
Jaeld Çela, ish-drejtor i Policisë në Vlorë, është në kërkim prej më shumë se një viti. Ai akuzohet nga prokuroria për bashkëpunim në kultivimin dhe trafikimin e lëndëve narkotike. Edhe pse në arrati, Çela ka kërkuar herëpashere, nëpërmjet avokatit të tij, mbylljen e hetimeve.
Gjergj Kohila, ish-shef i sektorit të luftës kundër krimit të organizuar në Vlorë, është një tjetër zyrtar në arrati, për të cilin nuk dihet vendondodhja prej më shumë se një viti
Sokol Bode, ish-shef i postës kufitare të Dhërmiut, është një tjetër zyrtar në arrati në hetim për favorizim të kultivimit dhe trafikimit të drogës.
Klemend Balili ish-drejtor i Transportit në Sarandë, është i vetmi zyrtar i cili u vetëdorëzua pas një viti arrati, edhe ky i akuzuar për trafik ndërkombëtar të lëndëve narkotike.
Të gjitha dyshimet për rastet e mësipërme janë mbështetur në një dekonspirim të mundshëm të operacioneve të policisë.
Ndërsa mbetet për tu parë tashmë nëse gjyqtari Aliaj do të kthehet në detyrë apo do të jetë zyrtari I radhës që humb pa gjurmë. Dl/ Opinion.al
