Tri pistoleta dhe 210 fishekë janë zhdukur nga magazinat e armatimit të komisariatit të policisë së Hasit, ndërsa magazinieri është arrestuar në flagrancë.
Ai akuzohet se ka vjedhur armatimin i cili mund të jetë shitur tek persona me precedentë penalë. Zbulimi është bërë nga specialistët e inspektimit të Çëshjteve të Brendshme, pas një kontrolli të kryer aty.
Sipas njoftimit të Ministrisë së Brendshme, Shaban Bera, 54 vjeç, me detyrë Kujdestar-Magazinier, pranë Komisariatit të Policisë Has, akuzohet për veprën penale “Vjedhje duke shpërdoruar detyrën ”, të parashikuar nga neni 135 i Kodit Penal.
Nga inspektimi i kryer në ambientet e magazinës së armatimit të Komisariatit të Policisë Has, u konstatua se mungonin 3 pistoleta, 210 fishekë, si dhe mosrakordim të numrit serial të një pistoletë thikë.
Një vit më parë, në muajin Shkurt të vitit 2016, SH.Ç.B.A-ja arrestoi për të njëjtën vepër penale magazinierin e Drejtorisë së Policisë Kukës, Përparim Dauti.
Pas kontrollit të kryer në magazinat e policisë që kishte në përgjegjësi Dauti, u vu re se mungonin 12 000 fishekë në magazinë.
