Moska e konsideron mundësinë e transferimit të armëve bërthamore nga perëndimorët në Kiev si një përgatitje për një konflikt bërthamor me Rusinë. Kështu është shprehur sot nënkryetari i Këshillit të Sigurimit në Rusi, Dmitry Medvedev, i cili nuk ka kursyer fyerjet për Presidentin amerikan Joe Biden.
“Politikanët dhe gazetarët amerikanë po diskutojnë seriozisht pasojat e transferimit të armëve bërthamore në Kiev. Duket se shakaja ime e trishtuar për Bidenin e çmendur dhe budalla, i cili vendosi të largohej me hijeshi nga jeta, duke marrë me vete një pjesë të konsiderueshme të njerëzimit, po kthehet në një realitet të frikshëm”, ka shkruar Medvedev në kanalin e tij në Telegram.
Duke komentuar këtë “marrëzi”, siç tha ai, Medvedev vuri në dukje se ideja e transferimit të armëve bërthamore në regjimin e Kievit është kërcënim për Kremlinin.
“Transferimi i armëve bërthamore në një vend në luftë me fuqinë më të madhe bërthamore? Vetë ideja është aq absurde sa ngre dyshime për praninë e psikozës paranojake te Joe “The Walking Dead (Zombi)” dhe të gjithë ata që flasin për përshtatshmërinë e një hapi të tillë“, shtoi Medvedev.
Në të njëjtën kohë, theksoi ai, “transferimi aktual i këtyre armëve mund të barazohet me një akt të kryer agresioni kundër vendit tonë në kuptimin e paragrafit 19 të Parimeve Themelore të Politikës Shtetërore në fushën e parandalimit bërthamor“.
“Pasojat janë të dukshme”, përmblodhi Medvedev. Medvedev gjithashtu foli sot për armët bërthamore, në një intervistë në kanalin televiziv Al Arabiya, duke u bërë thirrje SHBA-ve “të mos bëjnë si të zgjuar” kur diskutojnë kërcënimin bërthamor nga Rusia, por të kujtojnë se kanë përdorur armë të tilla kundër Japonisë dhe të kërkojnë falje ndaj japonezëve.
“Vetëm një vend në historinë e njerëzimit ka përdorur armë bërthamore – Shtetet e Bashkuara të Amerikës. Prandaj, le të mos luajnë zgjuar kur flasin për kërcënimin që vjen nga Rusia, por le të kujtojnë kërcënimin e tyre dhe le t’i kërkojnë falje japonezëve sepse ata kurrë nuk e kanë bërë këtë“, tha Medvedev.
Në të njëjtën kohë, ai tha se Rusia paralajmëroi palën amerikane për përdorimin e raketës “Oreshnik” për të shmangur një konflikt ndërkombëtar, ndërsa përdorimi i raketave me rreze të gjatë veprimi nga Ukraina, i cili u pasua nga reagimi i Moskës, e çon konfliktin në një fazë shumë më të tensionuar.
“Siç dihet, ne njoftuam amerikanët se do të përdoret një raketë balistike hipersonike, e quajtur Oreshnik, pasi kemi marrëveshje dhe detyrime të tilla me ta, që të mos lindë një konflikt ndërkombëtar, një konflikt i përmasave të ndryshme”, tha ai.
