Ka dalë sot për t’u njohur me masën e sigurisë Fredi Krasniqi, i arrestuari për shtëpinë e barit dhe arsenalin e armëve që u zbulua në Shijak. Gjykata e Durrësit vendosi për të masën “arrest me burg”.
Mësohet se Krasniqi ka marrë përsipër i vetëm autorësinë e për lëndë narkotike dhe armëve që u gjetën në banesë.
Para togave të zeza ai tha se e ka kryer veprimtarinë kriminale pasi është invalid dhe paratë i duheshin për të kryer një ndërhyrje shëndetësore.
Krasniqi u arrestua si rezultat i operacionit policor të koduar “Krahët e krimit”, ku në kërkim u shpall dhe kërkim vëllai i tij, Selman Krasniqi.
Gjatë operacionit u zbulua se kati i tretë dhe i katërt i banesës së dy vëllezërve, ishte përshtatur për kultivimin e bimëve narkotike, me anë të llambave. Gjatë kontrollit në këto dy kate, u gjetën dhe u sekuestruan 444 bimë narkotike kanabis, 222 llamba elektrike dhe pajisje të tjera që shërbenin për kultivimin e bimëve narkotike.
Po ashtu në një ambient me mur të dyfishtë, në këtë banesë, u gjet i fshehur një arsenal armësh, i përbërë nga 10 kallashnikovë, 1 pushkë, 1 automatik shars, granata dore, një hark luftarak, një jelek antiplumb, një palë dylbi dhe municion luftarak që u sekuestruan në cilësinë e provës materiale.
