Pesë persona janë arrestuar nga Policia e Mirditës, ndërsa janë sekuestruar armë, drogë dhe municion luftarak.
Në kuadër të operacionit të koduar “Bulshar”, policia arrestoi J. N .,28 vjeç, F. Rr., 27 vjeç, K. L., 29 vjeç, N. Rr., 28 vjeç dhe N. L., 59 vjeç, të gjithë banues në fshatin Bulshar të Mirditës.
Sipas autoriteteve, këta persona në bashkëpunim me njëri-tjetrin, po përgatisnin një sasi lënde narkotike në doza të vogla dhe më pas do e shpërndanin.
Gjatë kontrollit të ushtruar në godinën e braktisur ku të arrestuarit qëndronin, policia sekuestroi në cilësinë e provës materiale një sasi lënde narkotike. Ndërsa në kontrollet e bëra në banesat e tyre, u sekuestruan armë dhe municione luftarake.
Mbi të arrestuarit, rëndojnë akuzat për “Prodhimi dhe shitja e narkotikëve”, “Moskallëzimi i krimit”, “Mbajtja pa leje e armëve të zjarrit dhe municionit luftarak”./ Opinion.al
