Një fanellë verdhezi dhe shok skuadre me Jadon Sancho. Kjo mund të jetë e ardhmja e Armando Brojës, sipas të përditshmes britanike “The Sun”, që raporton se sulmuesi shqiptar është në radarët e Borusia Dortmund.
Finalistët e Champions League shpresojnë se do të marrin sulmuesin, duke derdhur në arkat e Chelsea 25 milionë euro, edhe pse londinezët kërkojnë rreth 50 milionë për kartonin e bomberit kuqezi.
Sipas “The Sun”, bisedimet mes dy klubeve për të realizuar transferimin në merkaton e verës janë në një fazë të avancuar dhe Broja, gjithashtu, besohet të jetë i interesuar për një lëvizje në Gjermani.
Sulmuesi ka qenë i huazuar te Fulham që nga janari, por mezi ka zbritur në fushë për shkak të zgjedhjeve të trajnerit. Pavarësisht kësaj te Dortmund besojnë se Broja mund të shndërrohet në një “minierë ari” për arkat e klubit në të ardhmen, siç ka ndodhur me Mario Gotze, Jude Bellingham apo Abumeyang.
Dortmundi ka treguar interes për Brojën edhe më parë, por asnjë marrëveshje nuk u realizua mes klubeve.
