Qendërmbrojtësi i kombëtares shqiptarë të futbollit dhe Torinos, Arlind Ajeti, po vuan prej disa javësh nga dëmtimet që nuk po e lejojnë atë të tregojë vlerat e tij te skuadra italiane. Humbja e dy takimeve të kombëtares ndaj Marokut dhe Maqedonisë tashmë mund të konsiderohet si e sigurt, por Ajeti ka filluar të rrezikojë edhe vendin e tij te Torino.
Shqiptari është dëmtuar dy herë deri tani, njëherë në fillim të përgatitjeve në miqësoret e para, dhe më vonë sërish për shkak të një kontraktimi muskular të vazhdueshëm, që e pengoi atë të ishte i gatshëm për trajnerin Mihajloviç në ndeshjen e parë të Serisë A në “San Siro” kundër Milanit. Nga raportimet e fundit duket se Ajeti nuk do të jetë i gatshëm as për takimin kundër Bolonjës.
Portali “toronews.net”, i cili merret me lajme nga klubi i Torinos, raporton se dëmtimet e shpeshta të Ajetit po bëjnë drejtuesit e skuadrës të konsiderojnë afrimin në ditët e fundit të merkatos të një tjetër qendërmbrojtësi. Në rast se diçka e tillë ndodh, mbrojtësi shqiptar do të ketë akoma më shumë probleme për të gjetur hapësira në ekipin torinez, teksa do të shtohej konkurrenca.
