E ardhmja e Arlind Ajetit dhe Thomas Strakoshës ka qenë ne diskutim deri në minutat e fundit të datës 31 gusht. Të dy futbollistët kërkoheshin nga klube të tjera që ishin gati t’i huazonin për këtë sezon. Por në fund, si Torino, ashtu edhe Lacio, kanë vendosur që të refuzojnë ofertat që u kishin mbërritur për futbollistët shqiptarë.
Dëmtimi i Ajetit dhe mbipopullimi i prapavijës së Torinos, bëri që në Itali të hapeshin zëra se mbrojtësi i përfaqësueses shqiptare mund të ndryshonte klub, ndonëse kishte pak më shumë se një muaj që i ishte bashkuar skuadrës së tij të re. Për futbollistin u interesua Peskara, e cila bëri një kërkesë formale për huazimin e tij. Por Torino e refuzoi menjëherë, pasi drejtuesit e klubit dhe trajneri Mihajloviç janë të bindur se qendërmbrojtësi do të jetë një element i vlefshëm në këtë sezon. Me largimin e Maksimoviç, në prapavijën e Torinos hapet një vend bosh dhe Ajeti është bashkë me Rosetinin e De Silvestrin në garë për formacionin titullar. Nuk kanë munguar ofertat as për Thomas Strakoshën, i cili kërkohej nga dy klube greke, të gatshme t’i ofronin atij mundësinë që të luante si titullar në kampionatin helen për këtë sezon. Por Lacio ka vendosur të mbajë portierin e talentuar shqiptar, sidomos pasi është larguar Berisha drejt Atalantës.
Marketi është titullar i padiskutueshëm te klubi italian, por Strakosha do të ketë mundësinë që të garojë për vendin e zëvendësuesit të tij me kroatin Vargiç. Ky i fundit nuk i pëlqen aq shumë trajnerit Inzagi, ndaj nuk është çudi që në rast nevoje, ai të kthejë sytë pikërisht nga portieri shqiptar, të cilin te Lacio shpesh e kanë cilësuar si e ardhmja e katërkëndorit të kësaj skuadre.
