Shqipëria ka aplikuar për të qenë një nga vendet kandidate që do të mirëpresë zhvillimin e finales së Superkupës së Europës në vitin 2019. Mirëpo, “Panorama Sport” ka bërë një vëzhgim të situatës aktuale të punimeve për të parë gjendjen momentale. Jo vetëm kaq, por në një intervistë për gazetën, anëtari i Komitetit Ekzekutiv të FSHF-së, Arben Dervishaj, është i bindur në përfundimin në kohë të impiantit.
Kandidatura
“Në bazë të premtimit që stadiumi do të çelet me një finale të ‘Superkupës së Europës’, kemi bërë edhe kërkesën në UEFA. Ai do të jetë një stadium cilësor dhe që i plotëson të gjitha standardet. Besoj se për të promovuar një vend që ka rritje në futboll, mund të kemi shpresa që komisioni i UEFA-s mund ta pranojë kandidaturën tonë”.
Afatet kohore
“Çdokush që kalon pranë impiantit, mund të shohë vetëm atë që duket: pra situata aktuale të ofron vetëm hekura dhe beton. Mirëpo, ndërtimi nuk është vetëm çfarë po bëhet konkretisht, por edhe çfarë po porositet. Kompania ka marrë masa dhe që tani është duke u menduar për instalimet elektrike, të cilat do të na bëjnë të fitojmë kohë në të ardhmen.
Mund të them që janë përfunduar 3/4-tat e themeleve dhe kanë mbetur për t’u bërë vetëm soletat, të cilat besoj se brenda këtij muaji do t’i mbarojmë. Në katin zero, mund të them që pjesa e jashtme është me strukturë metalike dhe ajo kërkon më pak kohë sesa betonimet. Gjithashtu, shumë sisteme po porositen që tani.
Një shembull që mund t’ju jap, është që momentalisht kemi diskutuar me arkitektin, i cili po nis të porositë elementet e fasadës, të cilat këtu do të vijnë vetëm për t’u montuar. Në ndërtimin e një stadiumi, nuk punohet vetëm në kantier, por edhe në prapavijë. Sapo të përfundohet soleta e bodrumeve, sipër nis ngritja e stadiumit, ndërkohë që në katet e nëndheshme do të nisë puna për mbarimin e tyre. Pra, do të punohet paralelisht në të gjitha drejtimet. Jemi të bindur që, në fund të vitit 2018, Tirana do të ketë stadiumin gati”./ Panoramasport.com.al Olsi Tujani
