Përplasja në arbitrazhin ndërkombëtar me sipërmarrësin italian, Francesko Beccheti, duket se do t’i kushtojë shumë shtrenjtë qeverisë shqiptare. Sipas një vendimi të datës 9 dhjetor 2015, studios avokatore që do të përfaqësojë Shqipërinë në arbitrazh do t’i paguhen 1.95 milionë euro, një prej shifrave më të larta të paguara deri më sot nga shteti shqiptar. Megjithëse është marrë para më shumë se një muaji, Vendimi është publikuar vetëm dje në Fletoren Zyrtare.
“Këshilli i Ministrave vendosi Autorizimin e Ministrisë së Energjisë dhe Industrisë që,
nëpërmjet Avokaturës së Shtetit, të lidhë shtesë kontrate, me firmën avokatore ‘Wragge
Lawrence Graham & Co LLP’, e cila është përzgjedhur nga Avokatura e Shtetit përmes
një procedure konkurruese për përfaqësimin e Republikës së Shqipërisë në dy çështje
arbitrazhi ndërkombëtar, të iniciuara nga persona fizikë ose juridikë, pjesëtarë të grupit
Becchetti”, thuhet në Vendim. /shqiptarja.com/
