Ish-deputeti i PS-së dhe bashkëthemeluesi i LMN-së, Lëvizjes për Mendimin Ndryshe në vitin 2009 bashkë me Ben Blushin brenda PS-së, duke se e ka braktisur këtë të fundit përsa i përket qëndrimit për referendumin brenda Partisë. Malaj i ka dalë në krah vendimin e Kongresit të 19 marsit të socialistëve për referendumin për mandatin e kreut të kësaj partie. Në një intervistë për gazetën “Panorama”, Malaj shprehet se debatet e brendshme s’duhet të krijojnë kriza permanente.
“Referendumi ka legjitimitetin e votës mbështetëse të Kongresit. Ballafaqimi i alternativave për të cilat do të votohet nuk duhet të jetë një luftë e përditshme mediatike. Aksesi mediatik i Kongresit, si edhe diskutimet dhe debatet televizive rreth tij kanë krijuar mundësinë që votuesit të jenë të informuar për argumentet pro dhe kundër. Kjo mund t’i shërbejë një procesi votimi dhe certifikim rezultati sa më të qetë”, thotë Malaj.
Për largimin e disa figurave të vjetra nga PS-së siç është Maqo Lakrori, Ndre Legisi, Marko Bello, apo dhe Luan Hajdaraga etj., Malaj tha se: “Shumë prej kolegëve kanë kontribuar në historinë 25-vjeçare të PS. Ndoshta ata e mirëpritën mesazhin e Ruçit se partia mund të ketë gabuar ndonjëherë. Gjeneratat në PS duhet të jenë sa më harmonike. Të rinjtë janë promotorë të ndryshimeve, ndërsa rezultatet arrihen kur bashkëpunimi midis gjeneratave është i natyrshëm”.
“Historia e debateve në PS është dinamike. Platformat alternative duhet të mos dëmtohen nga debatet ku dominon tensionimi që ushqen kriza permanente. Pas përfundimit të Kongresit dhe përballë zgjedhjeve parlamentare, ndoshta ka akoma hapësira për të trajtuar opsionet që mund të reduktojnë kostot e zhvillimeve aktuale mbi qeverisjen e vendit dhe në zgjedhjet e ardhshme parlamentare”, tha Malaj.
