Ministria e Brendshme prezantoi sot aplikacionin “Agjencia Dixhitale”, një mjet i ri dhe i thjeshtë në duart e çdo qytetari për të raportuar shkelje apo abuzime nga punonjës të Policisë së Shtetit, Gardës së Republikës apo Shërbimit Zjarrfikës, e jo vetëm, në çdo kohë, nga çdo vend dhe në anonimat.
Aplikacioni është tashmë aktiv për iOS dhe Android – falas dhe i aksesueshëm për të gjithë.
Në aktivitetin e zhvilluar për prezantimin e aplikacionit morën pjesë përfaqësues të AMP-së, Ministrisë së Brendshme dhe misionit ndërkombëtar ICITAP.
“Agjencia Digjitale u ofron qytetarëve një mjet të ri, të drejtpërdrejtë dhe të thjeshtë për të raportuar çdo shkelje apo abuzim nga punonjës të Policisë së Shtetit, Gardës së Republikës apo Shërbimit Zjarrfikës, tre autoritetet që monitorohen nga kjo Agjenci. Përmes tij dhe përmes forcimit të platformave ekzistuese, dërgojmë një mesazh të qartë se në Shqipëri nuk ka vend për abuzim me uniformën, nuk ka vend për pandëshkueshmëri, nuk ka vend për heshtje përballë padrejtësive”, tha ministri i Brendshëm, Ervin Hoxha, gjatë prezantimit zyrtar të aplikacionit nga Agjencia e Mbikëqyrjes Policore (AMP).
Ministri Hoxha theksoi se kjo platformë do të funksionojë paralelisht me kanalet ekzistuese të denoncimit, si numri jeshil 0800 90 90, duke përfaqësuar një hap të rëndësishëm në modernizimin e administrimit të ankesave dhe forcimin e integritetit institucional.
Drejtori i Përgjithshëm i AMP-së, Florian Sulejmani, deklaroi se ky aplikacion vjen në një moment me rëndësi të veçantë për vendin, duke pasur parasysh rritjen e ndjeshme të numrit të vizitorëve të huaj gjatë sezonit turistik.
“Kjo platformë digjitale rrit sigurinë publike duke kontribuar në imazhin e Shqipërisë si një vend mikpritës që i jep prioritet dhe transparencë në standardet europiane të shërbimeve. Për ne, në qendër të veprimtarisë së përditshme qëndron qytetari. Angazhimi ynë i palëkundur është ndërtimi i një sistemi që garanton drejtësi, siguri dhe respekt të plotë për të drejtat e njeriut”, tha Sulejmani.
Aplikacioni “Agjencia Digjitale” mundëson raportime në çdo kohë dhe nga çdo vend, duke ofruar gjithashtu mundësinë për të denoncuar në mënyrë anonime. Kjo e bën më të thjeshtë dhe më të sigurt pjesëmarrjen e qytetarëve në procesin e llogaridhënies dhe transparencës institucionale.
