“Deri dje pa asnjë sistem e garanci për barnat, që mungonin në spital dhe shiteshin sa “frëngu pulën” farmacive të mbira si këpurdhat rrotull QSUT, ndërsa sot me një depo moderne barnash të standarteve europiane, që garanton sistemin e furnizimit, sigurinë e medikamenteve, transparencën e konsumit të tyre për pacientët e QSUT”.
Ky është teksti që kryeministri Rama shoqëronte sot videon ku ai së bashku me ministren Manastirliu dukeshin teksa inspektonin punën në depon e re të barnave me sipërfaqe 3 mijë metra katrorë hapsirë magazinimi.
Por në të njëjtën ditë në dyert e QSUT shfaqet një tjetër realitet.
Është rasti i një vajze 4-vjeçare nga Elbasani, e cila u dërgua në spital, për shkak të djegieve të shkaktuar nga uji i nxehtë.
Në një video të publikuar nga gazetarja e Klan Plus, Ermelinda Hoxhaj ai që bën apel për ndihmë është Pëllumb Kurti, xhaxhai i 4-vjeçares që ndodhet e shtruar në repartin e djegie-plastikës. Ai, rrëfen se mjekja i ka dhënë një recetë me barna që spitali nuk i disponon, por që vlera e tyre arrin në 600 mijë lekë të vjetra dhe familja e ka të pamundur për ta përballuar.
“Jam Pëllumb Kurti. Jam nga Shushica e Elbasanit. Kam ardhur me urgjencë me ambulancë. Këto ilaçe në recetë kushtojnë 600 mijë lekë. Unë si kam. As spitali nuk i ka këto ilaçe. Fëmija është në spital, është 4 vjeçe. Po më vdes mbesa në spital. Unë nuk kam të ardhura që t’ja blej. I bëj thirrje kryeministrit që të më ndihmoj, pasi e kam fëmijën e vëllait në gjendje të rëndë. Po më vdes vajza në spital. Doktoresha ma dha këtë recetën dhe më tha; “ik gjeji se unë nuk kam mundësi që t’i gjej”. Nuk ka faj doktoresha. Ajo po përpiqet jashtë mase, por s’ka ilaçe. Fëmija u dogj me ujë të nxehtë në shtëpi.”- tha ai.
Ndërkohë, 4-vjeçarja e shtruar në spital pret ende ndihmë, nga kushdo që mundet, në numrin: 068 2221670. /Opinion.al
