Si çdo të hënë, vjen në ekranin e televizionit Klan, “Your Face Sounds Familiar”, nën drejtimin e Alketa Vejsiut. Pjesë e saj janë personazhe të famshëm të showbizit shqiptar.
E dyta në radhë për nga interpretimi këtë natë pas Endri Prifit, ishte Anxhela Peristeri.
Ajo solli në qendër të vëmendjes figurën e njohur të Lara Fabian, këngëtaren franceze, me këngën, “Je suis malade”. Një këngë e cila në fokus të saj ka dhimbjen që buron nga dashuria.
Veshja, muzika dhe interpretimi i ndjerë, ishin fantastike sipas jurisë së këtij spektakli.
“Ishe super Anxhela”, ka thënë Arian Cani.
“Personazhi nuk është lehtësisht i imitueshëm por unë të përgëzoj”, tha Boiken Lako, një tjetër anëtar i jurisë.
Edhe pse jo një njohëse shumë e mirë e gjuhës franceze, ky nuk ka qenë një problem për këngëtaren. Duartrokitjet e shumta ishin treguesi më i mirë për këtë.
Anxhela Peristeri është vlerësuar gjithnjë për vokalin e saj potent dhe për faktin se ia del në imitimet e saj, kur sjell në skenë zërat e mëdhenj. Kujtojmë se herën e kaluar ajo bëri një interpretim fantastik të këngëtares greke, Anna Visi, e cila i siguroi asaj edhe kupën e spektaklit.
