David Sassoli, Presidenti i Parlamentit Europian, është shprehur ditën e sotme në Kuvendin e Shqipërisë se reformat e ndërmarra nga vendi ynë, tregojnë se pavarësisht mos hapjes së negociatave nga ana e Bashkimit Europian, vendi e ka të qartë rrugën që duhet të ndërmarrë.
Po ashtu, gjatë fjalës së tij, Presidenti i PE ka vlerësuar dhe paketën “anti-KÇK”, e cila u miratua nga Qeveria vetëm pak ditë më parë.
“Unë vij nga një vend që di shumë sa i përket luftës kundër krimit të organizuar dhe reforma e shpallur javën e kaluar nga qeveria mbart me vete diçka italiane, europiane. Mundësinë për të qenë të rreptë, por brenda një kornize të shtetit të së drejtës”, tha Sassoli.
Sassoli ka folur dhe në lidhje me procesin e hapjes së negociatave me BE, ai tha nga foltorja e Kuvendit se shtyrja e çeljes së tyre ishte një moment hidhërimi, duke theksuar se shtyrja e këtij vendimi nuk ishte një “jo” për Shqipërinë.
“25 qeveri europiane ishin të bindur që negociatat duhet të hapeshin, por nuk ndodhi kështu. Megjithatë nuk u tha një “jo”, vetëm sa është shtyrë afati. Në pritje për të fokusuar mekanizma lidhur me metodologjinë dhe në të njëjtën kohë për të bërë të mundur ndryshimin e mendimit të vendeve që kanë rezerva. Jemi të bindur që ne kemi të njëjtin vështrim drejt së ardhmes. Jemi të bindur që ky “stop” nuk përfaqëson një “jo”, por një ngadalësim, një moment tranzicioni gjatë të cilit patëm mundësi të shikonim edhe reagimin e institucioneve shqiptare dhe popullit shqiptar. Pasi e kuptuam se nuk doni të hiqni dorë nga reformat e mëdha për këtë vend dhe besojmë se edhe ky është një sinjal i rëndësishëm. Shpresoj që të merret një vendim pozitiv, mundësisht para Samitit të Zagrebit por më e shumta gjatë tij”,- tha ai.
Presidenti i PE përgëzoi dhe politikën shqiptare për gjetjen e dialogut në lidhje me Reformën Zgjedhore.
“Ky është gjest domethënës. Pasi edhe shumica, edhe opozita mendojnë se e ardhmja është e vendit është Bashkimi Europiane”./Opinion.al
