Kreu i Grupit Parlamentar të Partisë Socialiste, Taulant Balla, është shprehur se akti normativ për paketën “Anti-KÇK”, do të kalojë në Kuvend. Balla tha para gazetarëve se “anti-KÇK” ka mbështetjen e shqiptarëve dhe të partnerëve ndërkombëtar.
Kreu i Grupit Parlamentar të Partisë Socialiste, Balla tha se në skanerin e “Forcës së Ligjit” do të kalojnë të gjithë personat, që e kanë ngritur pasurinë e tyre nga aktiviteti kriminal, duke paralajmëruar se ditët dhe javët në vijim do të ketë goditje të çdo lloj pasurie, që mund të fshehë lidhje me terrorizmin.
Përsa i përketë kritikave të opozitës, Balla tha “Më vjen keq që rikonstatoj një vetëvrasje politike të opozitës, që kundërshton këtë akt, pra një stad të ri të luftës kundër krimit dhe terrorizmit.”
“Përgjigjja është në Kushtetutë. Akti normativ miratohet ekzakt, siç ka ardhur. Duhet të kuptoni që grupi i PS e mbështetë tërësisht aktin normativ, propozuar nga qeveria e Ramës, dhe është një hap i rëndësishëm, i cili çdo ditë që kalon ka mbështetjen e qytetarëve shqiptarë, si dhe të partnerëve të rëndësishëm të Shqipërisë. Qoftë në takimin me Merkel, qoftë në takimin me Pompeo, kjo paketë jo vetëm është prezantuar, po ka gjetur mbështetjen e partnerëve. Kjo është një garanci më shumë për ta çuar luftën dhe goditjen kundër krimit të organizuar në një nivel të ri të paparë deri më tani në Shqipëri. Fakti që fokusi i kësaj goditje janë asetet e siguruara përmes veprimtarive kriminale, iu garantoj që ky aksion do të ketë sukses dhe prej tani e tutje askush nuk do t’i shpëtojë sitës së operacionit “Forca e Ligjit’. Akti normativ do të kalojë ashtu siç ka ardhur, sepse është domosdoshmëri, që i bën mirë Shqipërisë dhe rrugës evropiane. Më vjen keq që rikonstatoj një vetëvrasje politike të opozitës, që kundërshton këtë akt, pra një stad të ri të luftës kundër krimit dhe terrorizmit. Fokusi i ligjit është edhe asete, apo llogari bankare, apo pasuri të tjera, që mund të jenë ngritur, nën mbështetjen e personave të lidhur me terrorizmin. Skaneri i këtij operacioni do të vijojë po njëlloj. Mos u habisni kur në ditët në vijim të keni goditje apo skanim të çdo lloj pasurie, që mund të fsheh lidhje me terrorizmin”, tha Balla.
Ndryshimet e ligjit anti-mafia janë pjesë e paketës anti-KÇK. Sipas draftit të publikuar në media bie ne sy transferimi nga Ministria e Financave tek ajo e Punëve të Brendshme, te agjencia që administron pronat e sekuestruara dhe konfiskuara, gjë që rrit edhe më shumë fuqitë e ministrit Sandër Lleshaj.
Çdo janar ministri i Brendshëm do t’i raportojë Këshillit të Ministrave mbi pronat e sekuestruara dhe konfiskuara nga krimi. Sipas amendimeve në ligji antimafia, 60% e fondit të siguruar nga agjencia që administron pasuritë e krimit, do t’i kalojë Policisë së Shtetit. Ndërsa 5% do të shkojnë për shpërblime për policët.
Në rast anulimi të sekuestros pas justifikimit të pasurisë, të interesuarit duhet të jenë të vëmendshëm për të rimarrë atë në kohë. Këtë e saktësojnë ndërhyrjet e parashikuara në ligjin organik të kësaj agjencie, pjesë gjithashtu e paketës anti-KÇK, që disponon A2.
Tashmë agjencia do të menaxhojë jo vetëm pasuritë e sekuestruara dhe konfiskuara në bazë të ligjit antimafia, kodi penal, ligji kundër terrorizmit por dhe ato që janë objekt i ligjit special apo dhe provat materiale që sekuestrohen nga Policia apo Prokuroria.
Aktualisht janë 189 pasuri të sekuestruara nga krimi i organizuar me vendim gjykate. Në të përfshihen llogari bankare, prona të luajtshme dhe paluajtshme dhe vlera e tyre llogaritet 26 milionë euro. 59 të tjera janë konfiskuar me vendim të formës së prerë me një vlerë rreth 6 milion euro.
Por duket se kjo performancë e institucioneve të drejtësisë nuk kënaq Qeverinë, arsye për të cilën hartoi paketën anti-KÇK. Ajo parashikon ndërhyrje në 5 ligje, 1 prej të cilave, ligji special, u krijua nga e para me efekt veprimi 1-vjeçar. Pjesë e paketës që synon të miratohet brenda këtij 3-mujori, janë dhe ndryshimet në ligjin antimafia, kodin penal, Policinë e Shtetit dhe për agjencinë që administron pronat e sekuestruara dhe konfiskuara nga krimi. / Opinion.al
