Ditën e djeshme kryeministri Edi Rama deklaroi se Qeveria miratoi paketën “anti-KÇK”, e cila synon sekuestrimin e pasurive të paligjshme.
Paketa ka hyrë me njëherë në fuqi si akt normativ, ku sipas draftit thuhet se Operacioni Forca e Ligjit” dhe Anti-terrori janë strukturat për zbatimin e aktit normativ.
Paketa “Anti-KÇK” ka si qëllim goditjen e krimit të organizuar, gjurmimin e pasurive të krijuara nga krimi dhe sekuestrimin e pasurive të paligjshme të personave nën hetim ose të dënuar.
Sipas paketës, edhe policia ka të drejtë të marrë masën e sekuestros për një pasuri. Pasuria më pas i kalon shtetit por pas vendimit nga gjykata.
Në krye të “KÇK” do të jetë Komiteti i Koordinimit që kryesohet nga ministri i Brendshëm, ndërsa në përbërjen e tij janë të përfshirë ministria e Drejtësisë dhe Financave, Prokurori i Përgjithshëm, drejtuesi i SPAK, kreu i SHISH, drejtori i Përgjithshëm i Policisë, kreu i Parandalimit të Pastrimit të Parave.
Ky akt normativ përcakton masat parandaluese me karakter të përkohshëm në kuadër të forcimit të luftës ndaj organizatave dhe grupeve të strukturuara kriminale, organizatave terroriste, bandave të armatosura, individëve të përfshirë në krime të rënda si dhe procedurat, kompetencat e kriteret për zbatimin e këtyre masave ndaj subjekteve të këtij akti normativ.
Qëllimi i këtij akti normativ është ndërhyrja emergjente dhe me karakter të përkohshëm në kushtet e nevojës së forcimit dhe ashpërsimit të luftës kundër krimit të organizuar, organizatave dhe grupeve të strukturuara kriminale, si dhe çdo grupi tjetër kriminal e terrorist, bandave të armatosura, individëve të përfshirë në krimet e rënda, me synim konsolidimin e sigurisë në vend, përmes rritjes së kapacitetit dhe nivelit të zbulimit, gjurmimit dhe parandalimit të krimit të organizuar, krimeve të rënda, terrorizmit dhe përdorimit prej krimit të organizuar të pronave me origjinë të paligjshme./ Opinion.al
