Ish-kryeministri Sali Berisha tha se akti normativ i ashtuquajtur “paketa antiKÇK” është rrëzuar njëherë nga Gjykata Kushtetuese në vitin 2015.
Në një intervistë televizive, Berisha deklaroi se ky akt shkatërron kushtetutën, vendimet e gjykatës së lartë dhe nxjerr vendin jashtë Konventës të të Drejtave dhe Lirive Themelore të Njeriut.
“Ky akt është rrëzuar nga Gjykata Kushtetuese në vitin 2015. Në atë kohë Rama e quajti FBI shqiptare ose byroja kombëtare e hetimit. U kundërshtua nga ne por ai kaloi në parlament”, tha Berisha. Ai rikujtoi një episod me ish-ambasadorin amerikan Lu.
“Në atë kohë ambasador i SHBA ishte Donald Lu dhe unë i ktheva një vizitë. Në fund të bisedës dhe mbrapa disa herë më kujtoi se kisha të drejtë në kundërshtimet tona. Në atë kohë në Shqiperi erdhi një nga juristët më të mirë në Europë ish drejtori i institutit “Max Planck”. Ai, i njohur me ligjin, kërkoi të shprehet në televizor dhe ka thënë fjalët më të ashpra për këtë ligj. Ligji nuk ka asnjë masë dhe asnjë vepër penale të pashkruar për ligjet shqiptare”, shtoi Berisha.
Sipas ish-kryeministrit ky akt i miratuar nga qeveria i ka dhënë kompetenca kushtetuese OFL-së dhe është një goditje për rendin kushtetues. /Opinion.al
