Një qytetare i është drejtuar emisionit “Stop” në Tv Klan për të denoncuar një rast të heqjes padrejtësisht nga puna.
Lytfie Belba tregon, se ka 6 vite si edukatore dhe prej Prillit të vitit 2021 ka qenë drejtoreshë e kopshtit “Lidhja e Prizrenit” në Paskuqan, që tani quhet kopështi “Borëbardha”. Një ditë u vonua 4 minuta në punë, erdhi nënkryetarja e Bashkisë Kamëz dhe e detyroi të ikte në shtëpi.
5 ditë më vonë i vjen urdhri i largimit nga puna, me pretendimin e moszbatimit të etikës në punë. Zonja kërkoi shpjegime, por nuk u prit nga askush. Kërkoi të qëndronte si edukatore, por as këtë nuk ia lejuan.
Në këto kushte, Lytfie Belba është drejtuar tek drejtori i arsimit parashkollor në bashkinë Kamëz, për të marrë një arsyetim për largimin nga puna, por ai e ka drejtuar në instanca më të larta.
Denoncuesja: Ku janë bazuar këta, që më kanë hequr nga puna?
Drejtori: Po e ke këtu të cituar. Konkretisht e ke të shkruajtur. Po cfarë, se si është… Se s’po të flas për të kaluarën.
Denoncuesja: Ku janë bazuar? Unë ku të shkoj, ta kërkoj këtë të drejtë?
Drejtori: Po ti shko kërkoje tek burimet njerëzore! Shko në vend tjetër! Ku di unë. S’jam unë për ktë pjesë. Unë të them…Ti thua “pse s’e kam të specifikuar”. E ke të specifikuar “Moszbatim i kodit të etikës profesionale në institucion”. Mund të ankohesh në instanca të tjera përkatëse! S’jam unë instanca përkatëse.
Denoncuesja: Ju jeni drejtori i arsimit.
Drejtori: Unë jam drejtori i arsimit. Dhe ca? Do të jap unë rrugëzgjidhje për shkresat dhe ankesat dhe vërejtjet, që ke marrë më para?
Denoncuesja: Po mua nuk më ka ardhur asnjë ankesë më para.
Drejtori: Zysha, për të kaluarën, s’di ctë them.
Kërkesa e Lytfie Belbës është të dalë e vërteta e pushimit të saj padrejtësisht nga puna si dhe të rikthehet në vendin e saj të punës si edukatore.
Për të sqaruar procedurën e largimit të zonjës u drejtuam në bashkinë Kamëz për të biseduar me kryetarin, Rakip Suli.
Kryetari: Si edukatore nuk ka pranuar dhe ka ardh tek ju. Uroj ta zgjidhi!
Gazetarja: Nuk ka pranuar të qëndrojë edukatore?
Kryetari: Edukatore që nesër. Edukatore, ë? Apo jo? Është shkarku si drejtoreshë.
Gazetarja: Tani, ju lutem! Ju ka kërkuar si edukatore?
Drejtori: Nuk ka ardhur fare sot.
Gazetarja: Tani po më hidhni hi sy për sy.
Kryetari: Vërejtja e parë është bërë më 02.06.2021. (Në këtë datë është bërë ankesa dhe jo vërejtja).
Gazetarja: Cila është vërejtja e parë?
Kryetari: Po ku jam mbështet më shumë unë? Tek kjo.
Gazetarja: Për çfarë e ka marrë vërejtjen e parë?
Kryetari: Tek kjo shkresë më tepër. Pse qesh?
Gazetarja: Ka ardhur një ankesë, që nuk ka ardhur me emra? Kush janë personat? Të paktën…
Kryetari: Janë në protokoll.
Gazetarja: Ka marrë një vërejtje për këtë? Ku e ka vërejtjen?
Burimet Njerëzore: Po, është bërë propozimi për masën.
Gazetarja: Është bërë propozimi? Vetëm propozimi? Ka marrë vërejtje?
Kryetari: E ndan gjykata. Nuk e ndajmë unë e ti.
Gazetarja: Juve ju vjen një ankesë dhe në bazë të kësaj ankese, është bërë e gjitha?
Kryetari: Jo një ankesë. Janë ato fëmijë, që s’pranojnë asnjë person, individ, që mos jetë në standardin e duhur.
Gazetarja: Ju e keni provuar? Keni qenë aty të kontrolloni, se si kjo zonjë flet me stafin?
Kryetari: S’jam kontrollor unë.
Gazetarja: Janë drejtuar? E kanë provuar? Kanë mbajtur një proces-verbal, sesi i flet stafit të saj?
Kryetari: Patjetër!
Gazetarja: Pse nuk ia keni vendosur zonjës në dispozicion?
Kryetari: Janë burimet. S’është duk fare. Ka ikur. S’du me bo avokatin e këtyre fare. E para: sjellja brutale, bajraktarizëm me administratën. Dy: moskomunikim me qytetarët.Tre: debate në sy të fëmijëve, ku fëmija në letrën e bardhë, ku ne japim mesazhe pozitive dhe ajo shkon e bën debate me kuzhinierin, me sanitaren, me edukatoren, në prezencë të fëmijëve, në klasa.
Gazetarja: Po ju po thoni diçka, që as nuk i keni të provuara. Unë mund t’ju vij gjithë ditën dhe t’ju them, që drejtori ka thënë kështu, kështu. Ju do e hiqni nga puna atë vetëm, se ju them unë?
Kryetari: E vendos gjykata.
Gazetarja: Ju do e hiqni nga puna atë vetëm, se ju them unë?
Kryetari: Është edukatore. Edukatore të vazhdojë!
Për gjithë procedurën e ndjekur kundrejt zonjës Lytfie Belba, sigurisht duhej një mendim eksperti ndaj “Stop” foli me Ndriçim Mehmetin, i cili është një specialist arsimi. Ai thotë se që në vitin 2009 është dhënë urdhër, që mos të merret për bazë asnjë ankesë anonime. Sipas tij, ka një procedurë, në bazë të së cilës ndodh shkarkimi./ TV Klan
