Ky oborr që dikur ka qenë shesh pushimi me lule e pemë, është degraduar dhe është kthyer në një vend parkimi nga motorrat e shpërndarjes së picave të Picerisë “Era Katering”.
Prej 15 vitesh banorët e pallatit përballë Librit Universitar në anë të Presidencës, përjetojnë këtë situatë katastrofale nga ora 7.00-24.00. Banorët e shqetësuar thonë për Opinion.al se çdo ditë duhet të durojnë zhurmat e papaqëve dhe furgonave që kanë zaptuar gjithë oborrin për parkim dhe ngarkim-shkarkim malli, erën e ushqimeve, mbetjet ushqimore që prodhon biznesi dhe që kanë ndikuar në shtimin e qenve të rrugës, duke u bërë një problem serioz për komunitetin dhe fëmijet e lagjes.
E duke mos mjaftuar vetëm kjo ju duhet të durojnë gjithashtu edhe sharjet dhe fyerjet e motoristave, që janë kthyer si “serenata” në orën dy pas mesnate.
Sipas qytetarëve Bashkia duhet të marrë masa për zgjidhjen e kësaj situate kaotike në mes të bllokut. Për këtë situatë banorët e zonës kanë protestuar disa herë mirëpo ankesate e tyre kanë rënë në vesh të shurdhër.
