Gjykata e Apelit Tiranë vendosi të mos lirojë nga qelitë e paraburgimit Anjeza (Husha) Shabanin, administratoren e kopshtit privat “Diren”, e akuzuar për dhunimin e një 3-vjeçari.
Në seancë prokuroria paraqiti provën rënduese për të akuzuarën. Sipas Akuzës, ekspertiza ka gjetur shenja të dukshme dhune në trupin e fëmijës së keqtrajtuar nga Anjeza Shabani.
Argumentet e avokatit dhe lutjet në lot e ngashërim të vetë 33-vjeçares para trupit gjykues, nuk bindën gjykatën për një masë më të butë sigurie.
Vendimi i Apelit u vulos nga një treshe gjyqtarësh të kryesuar nga gjyqtarja Evjeni Sinoimeri. Në vendimin e shpallur vetëm me diapozitiv, Apeli miratoi vendimin e dhënë nga Shkalla e Parë për caktimin e masës së sigurisë “arrest në burg” për Shabanin, për akuzat e “shpërdorimit të detyrës” dhe të “keqtrajtimit të të miturit”.
Lutja e Anjezës
Qetësia në të cilën Anjeza Shabani u shfaq gjatë seancës në Apel u prish në momentin që avokati i saj i përmendi të bijën 2-vjeçare.
“Klientja ka një vajzë të mitur, që ka nevojë për të ëmën”, ishte një nga argumentet e avokatit Roland Islami për gjykatën. Kaq mjaftoi që e dyshuara të shkrehej në vaj. Lotët e saj nuk ndalën edhe gjatë kohës që ajo vetë i kërkoi gjykatës ta lironte nga qelia.
“Unë jam e ndërgjegjshme se ai ishte një xhest që nuk më shkon për shtat mua dhe as arsimimit të cilin unë kam. Ishte vetëm një moment, që më rrëshqiti situata. Por jam po unë ajo që e ka qetësuar në fund fëmijën. Kjo shfaqet edhe në video, nëse e shikoni të paprerë. Në materialin bruto duket që unë e kam puthur fëmijën në fund. Po ta shikoni duket dhe edukatorja që nuk bën asnjë veprim. Ju lutem, edhe nëse duhet të rri në qeli përjetë, le të rri, por ju lutem të mos i mohohet nëna vajzës sime. Kam vetëm pak muaj që i kam hequr gjirin. Ju lutem”, tha e dyshuara, ndërsa mbulonte fytyrën me duar.
Pretendimet
Avokati mbrojtës i Anjeza Shabanit kërkoi zbutjen e masës së sigurisë për klienten e tij. Mbrojtësi tha se klientja e tij nuk ka përgjegjësi për “shpërdorim të detyrës”. Avokati tha se Shabani kishte rënë në kurthin e edukatores së kopshtit. “Siç duket dhe në video, tha avokati, ajo nuk reagon kur i mituri dhunohet. Ajo nuk ka bërë asnjë veprim, kur të paktën duhet të kishte bërë kallëzimin e krimit”, tha Islami.
Në këtë moment kryesuesja e seancës i tërhoqi vëmendjen, duke i thënë se seanca ishte për administratoren dhe jo për edukatoren e kopshtit. Nga ana tjetër, përfaqësuesi i Prokurorisë në seancë i kërkoi gjykatës të lërë në qeli të dyshuarën Shabani. Prokurori paraqiti si provë para trupit gjykues përfundimet e aktekspertimit mjekoligjor të kryer ndaj 3vjecarit të dëmtuar nga ngjarja.
Sipas prokurorit, në trupin e të miturit ekspertët kanë vënë re një sërë dëmtimesh. Duke iu referuar raportit, prokurori tha se dëmtimet janë shkaktuar nga mjete të forta dhe dy javë para ekzaminimit mjekësor. “Koha në të cilën ekspertët pretendojnë se janë shkaktuar dëmtimet përkon me kohën kur janë kryer veprimet nga ana e të pandehurës”, tha përfaqësuesi i Akuzës./ Panorama.al Armand Bajrami
