Anija Madleen, e nisur nga Koalicioni i Flotilës së Lirisë (FFC), është nisur drejt Gazës, duke transportuar ndihma humanitare, pasi palestinezët po përballen me mungesë të theksuar ushqimi, me mbi 90 ditë tanimë bllokadë totale nga Izraeli.
Në bord, ndohet edhe aktivistja e njohur për klimën, Greta Thunberg, bashkë me 12 aktivistë të tjerë. Ata kanë në plan të “çajnë” rrethimin izraelit në Rripin e Gazës dhe të shpërndajnë pakot.
Megjithatë, në mediat e huaja raportohet se kjo anije, që supozohet të kishte mbërritur në brigjet e Gazës brenda 48 orëve, do të ndalohet nga Izraeli dhe të gjithë anëtarët e bordit të arrestohen.
Madleen ndodhet aktualisht në ujërat territoriale egjiptiane.
Në një postim në rrjetin “X”, një anëtare franceze e Parlamentit Evropian, e cila ndodhet aktualisht në bordin e anijes, ka shkruar se është e pritshme që Izraeli të ndërhyjë sapo ata të afrohen.
Ajo gjithashtu deklaroi se Izraeli mund të përdorë një anije luftarake me raketa dhe forca komando elitare për të penguar misionin. tvklan.al
