Anija hapësinore ruse Luna-25 është përplasur në Hënë pasi u rrotullua në orbitë në mënyrë të pakontrolluar, tha korporata hapësinore e Rusisë, Roskosmos.
Roskosmos më herët tha se një “situatë anormale” kishte ndodhur ndërsa kontrolli i misionit u përpoq ta zhvendoste anijen në një orbitë në orën 11:10 GMT të shtunën, përpara një uljeje të planifikuar për të hënën.
Dështimi i misionit të parë të Rusisë në hënë në 47 vjet nënvizon rënien e fuqisë hapësinore të Rusisë që nga ditët e lavdisë së konkurrencës së Luftës së Ftohtë, kur Moska ishte e para që nisi një satelit në orbitën e Tokës – Sputnik 1, në 1957 – dhe kozmonauti sovjetik Yuri Gagarin u bë njeriu i parë që udhëtoi në hapësirë në vitin 1961.
Rusia nuk kishte tentuar një mision në Hënë që nga Luna-24 në 1976, kur Leonid Brezhnev sundoi Kremlinin.
Sipas zyrtarëve rusë të hapësirës, Luna-25 ishte menduar të ekzekutonte një ulje të butë në polin jugor të Hënës më 21 gusht.
Rusia ka qenë në garë kundër Indisë, anija kozmike Chandrayaan-3 e së cilës është planifikuar gjithashtu të ulet në polin jugor të Hënës këtë javë, dhe më gjerësisht kundër Kinës dhe Shteteve të Bashkuara, të cilat të dyja kanë ambicie të avancuara hënore.
Dështimi nënvizon gjithashtu presionin mbi ekonominë ruse prej 2 trilion dollarësh – dhe veçanërisht sektorët e saj të teknologjisë së lartë – ndërsa ajo përballet me sanksionet perëndimore që synojnë ndëshkimin e Rusisë për luftën në Ukrainë./Opinion.al
