Drejtori i Përgjithshëm i Policisë së Shtetit, Muhamet Rrumbullaku ka pritur në një takim ditën e sotme Drejtorin e Përgjithshëm të Policisë Sllovene, Senad Jusiç.
Lajmin e bëri të ditur Rrumbullaku, i cili nëpërmjet një postimi në rrjetet sociale, shkruan se vlerëson bashkëpunimin e mirë mes dy policive, mbështetur në tre marrëveshje bazë, të nënshkruara nga qeveritë e Shqipërisë dhe Sllovenisë.
Sipas Rrumbullakut, ky bashkëpunim ka qenë efektiv, veçanërisht në kuadër të INTERPOL-it dhe EUROPOL-it.
“Sfidat e reja të sigurisë, angazhimi i përbashkët kundër krimit të organizuar dhe migracionit të paligjshëm, krahas numrit të shtuar të turistëve sllovenë, të cilët vizitojnë Shqipërinë, na shtyjnë drejt rivlerësimit të marrëveshjeve ekzistuese mes dy vendeve. Ka ardhur momenti për të konsoliduar ndërveprimin në fushën policore, duke u bërë ballë edhe fenomeneve të reja në fushën e sigurisë”, u shpreh Drejtori i Përgjithshëm i Policisë së Shtetit.
Ndërkohë edhe Drejtori i Përgjithshëm i Policisë së Sllovenisë ka falënderuar Policinë e Shtetit për bashkëpunimin dhe mundësinë e takimit dypalësh, ndërsa u shpreh se fusha të ndryshme, si krimi kompjuterik dhe kibernetik, duhet të trajtohen me profesionalizëm, krahas goditjes ndaj krimit të organizuar dhe migracionit të paligjshëm.
Policia e Shtetit dhe Policia Sllovene ranë dakord të punojnë bashkarisht për rishikimin dhe plotësimin brenda vitit 2024 të marrëveshjes mes dy qeverive mbi bashkëpunimin në luftën kundër terrorizmit, trafikut të paligjshëm, drogës dhe krimit të organizuar, nënshkruar më 24.11.1993.
Drejtori i Përgjithshëm i Policisë Sllovene, Senad Jusiç, po zhvillon një vizitë në Tiranë, me ftesë të Ministrit të Brendshëm Taulant Balla.
