Kryeministri Edi Rama deklaroi në mbledhjen e grupit të PS, se 11 Maji duhet të jetë vula e vullnetit popullor për t’i dhënë mandatin e katërt socialistëve.
Sipas tij, Partia Socialiste duhet të fitojë mandatin e katërt për të përfunduar procesin e anëtarësimit të vendit në Bashkimin Europian.
Teksa tha se asnjëherë yjet nuk janë përputhur si sot, Rama theksoi se shpejtësia me të cilën është përparuar në hapjen e kapitujve është e paprecedentë.
“Asnjëherë yjet nuk janë përputhur si sot, asnjëherë konteksti gjeopolitik nuk i ka qenë i favorshëm kaq sa sot për ne. Nuk është dritare e hapur përgjithmonë, ky kontekst mund të ndryshojë, mundësia që marrëdhëniet tona me BE të kthehen sërish që “i keni bërë përparimet por duhet të bëni akoma”, është një mundësi që nuk është përjashtuar, por sot interesi i BE për t’u forcuar në të gjitha drejtimet është më i madh se sa çdo gjë tjetër, këtu është edhe përputhja e rrethanave tone me BE.
Nuk do të lejojmë që ta humbë si mundësi, kemi dakordësuar me BE një kalendar të negociatave, që është e paprecedentë, qysh nga viti i kaluar kur filloi të zbatohet procesi i negociatave dhe deri sot që flasim shpejtësia me të cilën kemi përparuar në hapjen e kapitujve është e paprecedentë.
Asnjë vend i rajonit nuk ka ecur me këtë shpejtësi, dhe jo thjesht për meritën tonë, por vullneti i palës tjetër.
Kur kemi ardhur në detyrë kemi qenë vrima e fundit e kavallit dhe prapambetja jonë në atë proces ishte e atillë që na u desh kohë për të afirmuar statusin e kandidatit, as për kandidat nuk na shikonin të gatshëm.
Kalendari që na ka dhënë është të mbyllim negociatat në 2027. Ose është e rëndësishme për 11 Majin. Ndërkohë që ne flasim sot, janë rreth 11 mijë persona të angazhuar që punojnë përditë për negociatat.
Janë afro 40 drejtues të grupeve negociatore dhe është një strukturë që është baza e suksesit të negociatave. 11 Maji duhet të jetë vula e vullnetit popullor për ti dhënë mandatin e 4 PS me një mbështetje si asnjëherë më parë në mënyrë që ne të mbyllim procesin që të mos kemi asnjë luhatje, asnjë ditë të humbur, nëse humbasin muajin ajo dritare mbyllet”, tha Rama.
