Demokratët në mbarë vendin janë ftuar që të votojnë më 22 korrik për zgjedhjen e kreut të ri të PD-së, pas mbylljes së mandatit katërvjeçar të Lulzim Bashës. Përballja është mes kryetarit të “ngrirë” Basha dhe ish-kreut të PD-së Eduard Selami. Por, pavarësisht se në data-bazën e saj PD-ja ka 100 mijë anëtarë, sipas statutit të partisë nuk do të mundet të votojnë që të gjithë për kreun e ri, pasi ata nuk paguajnë kuotat.
“Gazeta Shqiptare” ka mundur të sigurojë dy shkresat zyrtare të PD-së të dorëzuara në KQZ për bilancin financiar për vitet 2016 dhe 2015, sipas të cilave rezulton se ka zero kuota të anëtarësisë.
Kjo do të thotë që PD-ja nuk ka mundur t’i mbledhë kuotat anëtarëve të saj përgjatë këtyre dy viteve, ndërkohë që për vitin 2017 nuk ka dorëzuar ende asnjë dokumentacion për shkak se viti nuk është mbyllur. Gjatë vitit 2015, PD-ja ka mundur të mbledhë vetëm kuotat e deputetëve, duke publikuar shifrën 415.000 lekë, por asgjë nga anëtarësia në mbarë vendin.
Por në deklaratën e PD-së të publikuar më datë 2 korrik, theksohet se në vendimin e dy nënkryetarëve të partisë për hapjen e garës për kryetarin e Partisë Demokratike, përcaktohet se në votim do të marrin pjesë vetëm ata të cilët janë anëtarë deri në datën 28.06.2017. Ata deklaruan se është pikërisht Komisioni për Organizimin dhe Kontrollin e Operacioneve Elektorale, ai që ka autoritetin për përgatitjen dhe organizimin e operacioneve të votimit në nivel kombëtar dhe territorial.
Konkretisht, në këtë deklaratë thuhet: “Databaza e partisë krijohet dhe administrohet në përputhje me statutin e PDSH. Neni 13/1 përcakton detyrimin e mbajtjes së regjistrit elektronik, dhe pika 2 e këtij neni thotë: ‘Rregullat e hollësishme për formatin e regjistrit, administrimin dhe aksesimin e tij përcaktohen me vendim të kryetarit të partisë’. Në vendimin e dy nënkryetarëve të partisë për hapjen e garës për Kryetarin e PDSH përcaktohet se në votim do të marrin pjesë vetëm ata të cilët janë anëtarë të PDSH deri në datën 28.06.2017. Që nga data 28.06.2017, në PDSH nuk ka pasur dhe nuk do të ketë anëtarësime të reja derisa të përfundojë procesi i zgjedhjes së kryetarit të saj. Listat e anëtarësisë administrohen sipas Statutit dhe rregullave të përmendura më sipër”.
