Carlo Ancelotti pati të njëjtën dhimbje koke si Pep Guardiola në testin e tij të parë si trajner i Bayernit. Miqësorja e djeshme me ekipin e kategorisë së pestë në Gjermani, Lippstadt, u mbyll me fitoren 4-3 të bavarezëve, por gjithashtu me dëmtimin e holandezit Arjen Robben.
Në të 35′, 32-vjeçari merr një goditje në kofshën e djathtë dhe duhet zëvendësuar. E çuditshme dhe e dhimbshme, kur mendon se ai e kaloi gjysmën e sezonit të kaluar në infermieri prej problemeve muskulare.
Sot zbulohet diagnoza e tij. Gjithsesi, ndeshja përgjithësisht shkoi ashtu siç Ancelotti e kishte parashikuar. Green (9′), Robben (16′), Ribery (33′) dhe Joswig (49′, autogol) i dhanë Bayernit fitoren me golat e tyre, teksa Rump (51′), Parensen (57′) dhe Maiella (88′) ngushtuan diferencën për rivalët amatorë.
Kjo ndodhi sidomos sepse Ancelotti kishte zëvendësuar gjithë lojtarët kryesorë duke testuar të rinjtë.
“Është e vështirë të nxjerrësh përfundime nga një ndeshje e tillë. Pjesa e parë ishte e mirë. Më pas, unë doja t’u jepja lojtarëve të tjerë më shumë minuta dhe të mos rrezikoja“, – u shpreh italiani në “Sport1”. Ancelotti i gëzoi të gjithë me sjelljen e tij.
Pas mbarimit të ndeshjes, ai bëri një “selfie” me trajnerin kundërshtar, Stefan Fröhlich. Strategu i ri i Bayernit shfaq kudo qetësinë e tij dhe respekton çdo njeri.
Kjo e gëzon Bayernin. Drejtuesi Karl- Heinz Rummenigge u shpreh: “Ai është një njeri i këndshëm, shumë njerëzor dhe me zemër të madhe. Kemi marrë një trajner të mrekullueshëm.”
Pas ndeshjes, gazeta gjermane “Bild” përmendi shkurtimisht disa detaje të Ancelottit duke e krahasuar me Guardiolën.
Së pari, italiani lëviz shumë pak në zonën e trajnerit. Ai e ndjek ndeshjen me qetësi, duke kryqëzuar krahët përpara apo pas trupit. Së dyti, tekniku provoi të njëjtin sistem si Guardiola, 4-1-4-1, por me ndryshimin që mbrojtësit e krahut luanin më të tërhequr.
Ancelotti nuk e ndryshoi rreshtimin për 90 minuta, ndryshe nga sa bënte Pep. Dhe, së treti, italiani u paraqit shumë sportiv në ndeshjen e tij të parë si trajner i Bayernit. Teksa katalanasi tre vite më parë vishej me këmishë dhe pantallona, Ancelotti dje u vesh me kostum sportiv dhe atlete sportive.
Në fund, njeriu i cili ka punuar në Serie A, Premier League, Ligue 1 dhe La Liga, u shpreh optimist për të ardhmen e Bayernit: “Ne kemi një skuadër fantastike. Jam shumë i lumtur. Mendoj se do të kemi sukses.”
