Teksa ka uruar të gjithë shqiptarët e krishterë festën e Ditës së Ujit të Bekuar, kryetarja e Kuvendit Elisa Spiropali i uroi shërim të shpejtë kryepeshkopit të Shqipërisë, Anasats Janullatos.
Janullatos ndodhet i shtruar në një spital në Athinë për shkak të gjendjes së rënduar shëndetësore.
Spiropali thotë se Janullatos është i njohur botërisht për dijet, përkushtimin dhe kontributin në bashkëjetesën paqësore të popujve dhe të komuniteteve fetare.
“Sot, në Ditën e Epifanisë, Festës së Ujit të Bekuar, bashkohem me urimin e besimtarëve të krishterë për shpresën te fuqia e urtësisë, mirëkuptimi, bekimi dhe lulëzimi i natyrës dhe shpirtit njerëzor.
I uroj shërim të shpejtë dhe kthim në shërbim ndaj besimtarëve Fortlumturisë së Tij, Anastas Janullatos, Kryepiskopit të Shqipërisë, i cili në rrethana jashtëzakonisht të vështira, ringriti dhe fuqizoi Kishën Orthodhokse Autoqefale të Shqipërisë, dhe është i njohur botërisht për dijet, përkushtimin dhe kontributin në bashkëjetesën paqësore të popujve dhe të komuniteteve fetare”, shkruan Spiropali.
