Arritja e kuqezinjve në Europian ishte pa dyshim maja më e lartë e deritanishme e Kombëtares së futbollit. Për pasojë, shumë nga lojtarët arritën edhe pjacën më të lartë të tregut të transferimeve.
Megjithatë, 2016-a nuk ka qenë sukses i garantuar për të gjithë lojtarët kuqezi me skuadrat e tyre. Disa prej tyre u janë gëzuar vetëm gjetjes së skuadrave, pasi nuk kanë treguar asgjë nga forma dhe mundësitë e tyre. Të tjerë kanë arritur të ruajnë vazhdimësinë e formës, pavarësisht ndryshimit të skuadrës, kampionatit apo edhe… kontinentit.
PORTIERËT
Etrit Berisha
Kaloi një gjysmë sezoni me luhatje te Lacio nga janari deri në verë, më pas pjesëmarrja në Europian e detyroi gardianin që të ndryshonte ambient. Ai u huazua tek Atalanta.
Thomas Strakosha
E mbylli gjysmën e parë të vitit i huazuar te Salernitana dhe në verë u rikthye te Lacio.
Orges Shehi
Në aspektin e skuadrës, ai ishte dhe është pjesë e Skënderbeut, me të cilin e mbylli sërish si kampion i Shqipërisë. Sa i përket Kombëtares, ai ka ndryshuar stad tashmë, pasi është pjesë e stafit ndihmës të De Biazit .
Alban Hoxha
Debutoi me Kombëtaren në ndeshje zyrtare, në përballjen me Izraelin dhe e bëri duke pritur një 11-metërsh. Me Partizanin shkëlqeu, jo vetëm në kampionat, por edhe në kualifikueset e Europa Ligës.
MBROJTËSIT
Lorik Cana
E mbylli gjysmën e parë të vitit te Nanta dhe pas Europianit zgjodhi të tërhiqej nga futbolli i luajtur.
Ansi Agolli
Përveç titujve që janë bërë zakon së fundmi për të me Karabakun dhe pjesëmarrjes në fazën e grupeve të Europa Ligës, u gradua edhe si kapiten i Kombëtares pas largimit të Canës.
Arlind Ajeti
Pas disa muajsh qëndrimi pa skuadër, u transferua te Torino ku ende nuk ka debutuar në Serinë A. Vetëm pak minuta në Kupën e Italisë, edhe për shkak të një dëmtimi të dyfishtë që në fillim të sezonit.
Berat Gjimshiti
Mungesa e hapësirave tek Atalanta bëri që të huazohej tek Avelino në Serinë B.
Mërgim Mavraj
Sezon fantastik. Nga dëmtimi në gju dhe ndërhyrja kirurgjikale, u rikthye më në formë se kurrë. Vendimtar për Këlnin dhe aktualisht mungon vetëm firma për t’u transferuar te Hamburg që pagoi 1.8 mln euro për të blerë kartonin e tij.
Frederik Veseli
Europiani i shërbeu për t’u transferuar tek Empoli në Serinë A, ku edhe ka fituar një post titullari si mbrojtës i djathtë.
Elseid Hysaj
Pas gjysmës së parë të vitit 2016, ku vërtetoi formën e tij mjaft të mirë te Napoli, rifitoi rinovimin e kontratës me përmirësim të termave financiare.
Naser Aliji
Nga Bazeli, zgjodhi që të transferohej te Kaizerslautern në Bundesligën 2, ku ka fituar një post titullari.
Andi Lila
Titullar i përhershëm te PAS Janina.
MESFUSHORËT
Migjen Basha
Pasi mbylli gjysmën e parë të vitit te Komo, i huazuar nga Luzerna, në të dytën qëndroi sërish si pjesë e Serisë B. Te Bari nuk gjeti shumë hapësira në formacion, mirëpo në ndeshjet e fundit, pas ndryshimit të trajnerit, është bërë titullar i padiskutueshëm.
Burim Kukeli
Është pjesë e pandarë e Zyrihut, edhe në Ligën e Dytë, dhe diferenca e madhe me ndjekësit garanton rikthimin në Super Ligën helvete në sezonin e ardhshëm.
Taulant Xhaka
Shpirti luftarak i Bazelit. U lakua shumë në merkaton e verës, por rinovoi me kampionët zviceranë. I pazëvendësueshëm.
Ledian Memushaj
Kapiteni i Peskarës ishte një nga më të mirët në gjysmën e parë të vitit, kur edhe kontribuoi për ta ngjitur ekipin në Serinë A. E mbajti shiritin edhe në elitën e futbollit italian.
Odise Roshi
Gjysma e parë e vitit ishte me paraqitje mesatare në Kroaci te Rijeka. Pas Europianit, u transferua te Terek Grozni, e cila ka objektiva madhorë në Superligën ruse.
Jahmir Hyka
Vit tepër pozitiv për mesfushorin, si në mbyllje të edicionit të vjetshëm, ku me Luzernën provuan kualifikimin në fazën e grupeve të Europa Ligës, ashtu edhe në gjysmën e parë të edicionit aktual ku ka shënuar gjashtë gola. Rifitoi kthimin në Kombëtare.
Azdren Llullaku
Një nga sezonet më të mira të tij, ku ka shënuar 16 gola në gjysmën e parë të sezonit me Gaz Metan dhe aktualisht ka firmosur për dy vite tek Astana. Në garë për “Këpucën e Artë” europiane.
Ergys Kaçe
E mbylli edicionin me PAOK-un dhe pas Europianit u huazua te Plzen në Çeki. Pas kontradiktave me trajnerin, e mbylli aventurën dhe është rikthyer te PAOK-u. Probleme edhe me De Biazin.
Ermir Lenjani
Nga janari në qershor e mbylli sezonin me Nantën. Më pas, u rikthye te Rene, por kaloi një gjysmë sezoni krejtësisht në hije. Pritet të ndryshojë ekip në janar.
Eros Grezda
Me paraqitjet e tij te Lokomotiva e Zagrebit ka fituar ftesat në Kombëtaren e madhe. Po bën mirë në Kroaci.
SULMUESIT
Armando Sadiku
Goli në Europian është maja e deritanishme e karrierës së tij që u pasua me një gol në fazën e grupeve të Europa Ligës. Gjysmën e parë të vitit e kaloi te Vaduz, të cilën e shpëtoi në Superligë, ndërsa aktualisht është pjesë e Zyrihut që i bllokoi largimin.
Bekim Balaj
Me paraqitjen e tij te Rijeka deri në muajin qershor, fitoi vëmendjen e Terek Groznit që nënshkroi me të përpara Europianit. Po bën mirë edhe në Superligën ruse.
Sokol Cikalleshi
Gjysma e parë e vitit ishte fantastike. Pas Europianit ka humbur vendin në formacionin e Basaksehirit në kampionatin turk, i mungoi ftesa në ndeshjen e fundit të Kombëtares, por ka shfaqur formën në Kupën e Turqisë me tre gola.
Shkëlzen Gashi
La Bazelin dhe futbollin europian për t’u bërë një nga lojtarët më të paguar të Kolorado Rapids. Fitoi disa çmime personale, por “humbi” Kombëtaren.
Rei Manaj
Një gjysmë sezoni me Interin, ku bëri mirë sidomos me të rinjtë dhe më pas u huazua te Peskara, ku nuk është paraqitur ashtu siç pritej. Mund të rikthehet te zikaltrit për t’u huazuar diku tjetër.
OLSI TUJANI/panoramasport
