TIRANË- Shumë të dënuar do të lënë qelitë pasi përfitojnë nga amnistia “dhuratë” për festat e fundvitit. Ministria e Drejtësisë i ka propozuar qeverinë projektligjin për amnistinë, që me shumë gjasë do të miratohet brenda pak ditësh në Parlament. Gazeta Shqiptare që publikoi draftin shkruan se janë parashikuar në mënyrë specifike kategoritë përfituese.
Kështu, nga amnistia përfitojnë personat e dënuar me burgim deri në 2 vjet, personat e dënuar me kusht me gjobë apo personat, për të cilët gjykata ka caktuar një nga llojet e alternativave të dënimit me burgim, për dënime të dhëna deri në datën e hyrjes në fuqi të këtij ligji, pavarësisht nga koha e mbetur nga dënimi. Në draft thuhet gjithashtu se përfitojnë personat e dënuar me burgim, të cilëve, që në ditën e hyrjes në fuqi të këtij ligji, u kanë mbetur pa vuajtur nga ky dënim deri në 2 vjet.
Në kategorinë e përfituesve, hyjnë edhe të dënuarat femra, që në ditën e hyrjes në fuqi të këtij ligji, janë baras ose mbi moshën 50 vjeç, meshkujt, mbi 60 vjeç, si dhe personat e dënuar me burgim të cilët në kohën e kryerjes së veprës penale, kanë qenë baras ose nën moshën 18 vjeç.
Nga projektligji nuk përfitojnë personat e dënuar për krime të rënda, si krime kundër njerëzimit, krime seksuale, krime kundër jetës etj. Nuk përfitojnë nga kjo amnisti as personat e dënuar, që i janë shmangur ekzekutimit të dënimit të dhënë nga drejtësia.
