Ligji për amnistisë fiskale nuk do të miratohet në korrik. Komisioni parlamentar i Ekonomisë dhe ai i Ligjeve kanë shtyrë për në shtator shqyrtimin e projektligjit.
Vendimi u mor ditën e sotme pasi u mblodhën të gjitha rekomandimet nga grupet e interesit, si shoqatat e biznesit, shoqata e bankave, Prokuroria etj.
Projektligji ka hasur në kundërshti edhe kritika edhe nga faktori ndërkombëtar, si Fondi Monetar Ndërkombëtar, Moneyval.
Drafti i amnistisë është konsideruar ende i paqartë nga shoqata e bankave e cila ka bërë kërkesë për të sqaruar rolin e detajuar që do të kenë bankat në këtë proces.
Sipërmarrja ka bërë propozime për disa ndryshime në draftin e amnistisë, përgatitur nga Ministria e Financave, mes tyre edhe lidhur me detyrat që do të ketë njësia speciale në Drejtorinë e Përgjithshme të Tatimeve.
Deputeti socialist, Anastas Angjeli, ish ministër i Financave shpjegoi se amnistia mund të jetë e suksesshme vetëm nëse arrin tre konsensuse: atë politik, konsensus me grupet e interesit dhe me faktorin ndërkombëtar.
Mazhoranca në komisionin e Ekonomisë theksoi se kjo nuk është një tërheqje nga amnistia, një nismë kjo që kryeministri kërkon ta zbatojë nga 1 Janari 2021./ Opinion.al
