Skuadra e RNK Split ka pësuar dje humbjen e dytë radhazi në kampionat teksa është mundur nga kryesuesit e Dinamo Zagreb, për të regjistruar gjithashtu ndeshjen e gjashtë pa fitore. Nën këtë ritëm, futbollisti i ekipit Shpresa të Shqipërisë, njëherësh i grumbulluar edhe me Kombëtaren Kuqezi, Amir Rrahmani, që aktivizohet në kampionatin kroat me skuadrën e Split, tashmë rrezikon seriozisht pjesëmarrjen në Kupat e Europës.
Në kuotën e 44 pikëve në 33 javë, skuadra e RNK Split mban vendin e pestë, me dy pikë më pak se Lokomotiva Zagreb në vendin e katërt, që kualifikohet për në Europa League, e cila ka një ndeshje më pak. Një disfatë edhe më e rëndë për Rrahmanin, i cili veç Europës do të humbasë kështu edhe “derbin” me tre shqiptarët që aktivizohen te Lokomotiva, Grezda, Çekiçi dhe Prenga.
Ndërkohë, një lajm pozitiv për Rrahmanin është fakti që përtej humbjes dhe rrezikut për të mbetur jashtë Europës, dje, gjatë ndeshjes me kryesuesit, ka qenë nën vëzhgimin dhe mbikqyrjen e zbuluesve nga kampionatet dhe ekipet më të bujshme europiane. Sikurse raportojnë vetë mediat kroate, të ftuar special në ndeshjen e mbrëmshme kanë qenë zbuluesit dhe menaxherët e ekipeve të Manchester United, Chelsea dhe Sampdoria, të cilët kanë patur mundësinë të vlerësojnë edhe shqiptarin Amir Rrahmani.
