Turistët amerikanë vizituan të qetë Vatikanin, duke mos treguar shenja shqetësimi, pavarësisht paralajmërimit të Departamentit Amerikan të Shtetit në lidhje me sulme të mundshme terroriste.
ShBA gjatë një komunikatë kërkuan nga qytetarët amerikanë të bënin kujdes, pasi ekziston mundësia e sulmeve terroriste në Evropë gjatë periudhës së verës, ku në fokus do të jetë Kampionati Evropian që do të zhvillohet në Francë.
Megjithatë turistët amerikanë që ndodheshin në sheshin Shën Pjetër për të qenë të pranishëm në fjalimin e përjavshëm të Papës u shprehën se ndiheshin të sigurt, pavarësisht paralajmërimeve.
Në deklaratën e departamentit amerikan përmendej edhe dita ndërkombëtare e rinisë së kishë katolike që do të zhvillohet në Krakov të Polonisë mes 26 dhe 31 korrikut, aty ku pritet të jenë të pranishëm rreth 2.5 milionë persona.
Shqetësimi në lidhje me sigurinë në kontinentin e vjetër u rrit ndjeshëm pas sulmeve terroriste të 13 nëntorit në Paris ku humbën jetën 130 persona dhe dy shpërthimeve kamikazë në Bruksel më 22 Mars që shkaktuan 32 viktima.
Franca e ka shtyrë gjendjen e emergjencës deri në fund të Korrikut për të mbuluar Kampionatin Evropian dhe Turin çiklistik të Francës.
