Përmes një interviste në “Ekathimerini” ambasadori rus në Bashkimin Evropian, Vladimir Çizhov ka paralajmëruar Tiranën zyrtare rreth ambicies për të krijuar “Shqipërinë e Madhe”.
Gjithashtu ai theksoi se ndryshimi i kufijve mes Kosovës dhe Serbisë do të krijonte një precedent për vendet e tjera të rajonit.
“Kosova është çështje shumë e ndërlikuar. Nëse ata arrijnë të bien dakord, propozimi për shkëmbimin e territorit mund edhe të funksionojë. Por diçka e tillë do të krijonte një precedent për vendet e rajonit, në Maqedoninë Veriore ku një pjesë e madhe e popullësisë është shqiptare. Kam parë disa harta të Shqipërisë së madhe, ku përfshihet një pjesë e madhe e Greqisë”,-u shpreh Çizhov për të përditshmen greke.
Ndërkohë në lidhje me marrëveshjen e emrit mes Greqisë dhe Maqedonisë së Veriut ambasadori rus e konsideroi qesharake si dhe si nxitës për probleme në rajon.
“ Ajo çfarë u kam thënë miqve të mi grekë dhe maqedonas është se sa më shumë ta shtyjnë këtë çështje, pozicionet e palëve do të forcohen. Ditën e sotme dëgjova udhëheqësin konservator të opozitës, Mitsotakis, duke thënë se 70% e popullatës greke mendon se është një marrëveshje e keqe. Një përqindje e ngjashme është edhe në Maqedoninë e Veriut. A është kjo një mënyrë demokratike për të zgjidhur një problem? Kushtetuta maqedonase u shkel hapur, referendumi u shpall i pavlefshëm, presidenti nuk e nënshkroi atë, dhe tani kolegët e mi në BE thonë se kjo duhet të shërbejë si një shabllon për zgjidhjen e çështjeve të tjera”, -deklaroi Vladimir Çizhov gjatë intervistës për median greke./Opinion.al/
