Nga Eduard Zaloshnja
Vizita 4-orëshe në Tiranë e ndihmës-sekretares së shtetit amerikan, Viktoria Njulënd, prodhoi dy lajme: 1-Ambasadori Lu u tërhoq nga varianti i reformës në drejtësi, në të cilin vëzhguesit ndërkombëtarë do të ishin bosat e spastrimit të gjyqtarëve e prokurorëve shqiptarë të korruptuar; 2-LSI doli nga ekuacioni i 94 votave në Kuvend.
Deri dje, Ambasadori Lu po bënte përpjekje të bindte 94 deputetë shqiptarë që të votonin për variantin e reformës, në të cilin vëzhguesit ndërkombëtarë do të ishin bosat e spastrimit të gjyqtarëve e prokurorëve shqiptarë të korruptuar.
Por siç duket, ai e pa që ky numër nuk mund të arrihej. Për t’u arritur ky numër, duhej që 64 deputetë të PS-së, 20 të LSI-së dhe 10 deputetë të tjerë të ndryshëm të votonin për variantin që amabasadori Lu kishte kërkuar përmes një letre publike të votohej në Kuvend, pavarsisht nga përkatësia partiake e çdo deputeti.
Se cilët deputetë nuk i përmbushën llogaritë paraprake të ambasadorit Lu ndoshta nuk do të mësohet kurrë, por fakt është që ndihmës-sekretarja Njulënd nuk takoi asnjë përfaqësues të LSI-së, dhe për më tepër, deklaroi se dy udhëheqësve që ajo takoi (Bashën e PD-së dhe Ramën e PS-së) u paraqiti një propozim hibrid, të hartuar nga ambasadori Lu dhe ambasadorja Vllahutin, i cili mund të përbëjë bazën e konsensusit mes dy paleve.
Fill pas kësaj deklarate, LSI-ja u shperndau mediave një letër te Petrit Vasilit drejtuar Fatmir Xhafës së PS-së, e cila, në fakt, ishte shkruar që në 8 korrik. Në të, Vasili i kërkonte Xhafës informacion mbi negociatat rreth zgjidhejs së nyjes së vettingut, ku kishte ngecur konsensusi.
Siç duket qartë nga publikimi i kesaj letre, LSI-ja nuk është konsultuar fare rreth atij variantit hibrid, i cili e bëri optimiste ndihmës-sekretaren Njulënd, se do të përbëjë bazën e konsensusit mes dy partive të mëdha.
Dhe në qoftë se optimizmi i ndihmës-sekretares Njulënd materializohet, 21 korriku do të prodhojë një reformë të drejtësisë shqiptare që do ketë këto pika kyçe:
1-Prokuroria speciale antikorrupsion do të përzgjidhet e do të jetë nën ndikimin e drejtpërdrejtë të Departamentit të Drejtësisë së Shteteve të Bashkuara;
2-Byroja e hetimit që do të përgatisë dosjet për këtë prokurori do të përzgjidhet dhe do të jetë nën ndikimin e drejtpërdrejtë të FBI-së amerikane;
3-Këshilli i emërimeve në drejtësi nuk do të zgjidhet nga partitë, por do të zgjidhet çdo vit me short nga gjyqtarët e prokurorët;
4-Drejtuesit e lartë të gjykatave dhe të institucioneve kryesore të dretësisë, në qoftë se nuk marrin dot votat e cilësuara në Kuvend (pra, nqs nuk marrin konsensusin e partive të Kuvendit), zgjidhen drejtpërdrejt, bazuar në renditjen që ka bërë këshilli i emërimeve (i cili, nga ana e tij, nuk varet nga partitë);
5-Komisioni i verifikimit të gjyqtarëve dhe prokurorëve aktualë, si dhe komisioni i apelit për këtë qëllim, do të përzgjidhen me pjesëmarrjen hibride të Kuvendit të Shqipërisë dhe vëzhguesve ndërkombëtarë, por do të jenë nën ndikimin e drejtpërdrejtë të një komisioni ndërkombëtar vëzhgimi, me ekspertë të dërguar nga Bashkimi Europian dhe SHBA-ja.
/Respublica.al
