Ambasadori amerikan Donald Lu u takua sot me deputetin e Partisë Demokratike, Astrit Veliaj në kuadër të takimeve që ai po zhvillon me disa deputetë të PD-së për të votuar Reformën në Drejtësi.
I kontaktuar nga panorama.al deputeti Veliaj tha se diskutuan me ambasadorin për çështjen e Reformës, por ai nuk i ka dhënë fjalën diplomatit amerikan se do ta votojë nëse PD dhe PS nuk bien dakord.
“Ishte një takim shumë miqësor. Unë ndava historitë e jetës sime me ambasadorin Lu, si një histori suksesi të një biznesi të ndershëm 25 vjeçar. Si shumë biznese të tjera të rëndësishme, ne kemi dhënë një kontribut të vyer për vendin”, tha Veliaj.
I pyetur lidhur me diskutimin e fundit për sistemin e Drejtësisë, ai tha se “ne folëm për Reformën në Drejtësi, por ambasadori nuk ma ka kërkuar votën. Duskutuam se si të gjendet konsensusi që drafti të kalojë me të gjitha votat e mundshme të partve në Parlament. i shpjegova ambasadorit se vota ime nuk është personale, por është votë partie. Unë jam unitar me Partinë Demokratike”, tha Veliaj.
Më herët ambasadori Lu është takuar edhe me Astrit Patozin dhe Majlinda Bregun.
