Ambasadori i Bashkimit Europian në Shqipëri, Luigi Soreca, thotë se opozita duhet të rikthehet në Kuvend dhe se djegia e mandateve është kundërproduktive. Në një intervistë për Top Channel, Soreca ka thënë se veprimet e opozitës janë kundër interesit të qytetarëve.
“Është e qartë, megjithatë, se heqja dorë nga mandatet është dukshëm kundërproduktive për Shqipërinë dhe shkon kundër interesave të qytetarëve për reforma. 93% e shqiptarëve dëshirojnë t’i bashkohen BE-së, që do të thotë se janë votues nga të gjitha krahët e Parlamentit”, është shprehur ai.
Soreca ka thënë se protesta është një e drejtë qytetare, por fatkeqësisht disa dhjetëra protestues ushtruan dhunë. Ai vlerësoi rolin e policisë, e cila menaxhoi situatën pa krijuar incidente dhe pa përshkallëzuar situatën.
Ambasadori ka bërë thirrje për dialog mes mazhorancës dhe opozitës. “Nga ana tjetër, ne ftojmë si qeverinë, ashtu dhe opozitën, që të angazhohen në diskutime konstruktive, me qëllim që ta kapërcejnë situatën politike aktuale dhe të garantojnë që vendi të vazhdojë në rrugën e tij të reformave. Nuk ka kohë për të humbur. Koha është tani!”, është shprehur.
