“Këtë javë pata një diskutim me një politikan që pretendonte se populli shqiptar nuk e kupton dot debatin për reformën në drejtësi”, kështu u shpreh Donald Lu sot në konferencën për korrupsionin, duke vazhduar se “sinqerisht, kjo është tipike për arrogancën e politikanëve dhe të elitës shqiptare që besojnë se vetëm ata janë boll të zgjuar sa të kuptojnë çfarë ndodh në shoqërinë shqiptare”.
Më tej numri 1 i diplomacisë amerikane, tha se qytetarët shqiptarë e shohin problemin e korrupsionit tek udhëheqësit e partive politike, prokurorët, gjykatësit dhe doganierët. Kjo sipas tij, tregon se shqiptarët në fakt, e kuptojnë më së miri këtë problem.
Duke iu referuar të dhënave të sondazhit që u publikuan sot nga USAID, ambasadori i SHBA tha se “problemet më të mëdha të korrupsionit mbeten tek udhëheqësit e partive politike, prokurorët, gjykatësit dhe doganierët. Nuk habitem aspak nga ky përfundim që tregon se populli shqiptar e kupton vërtet se çfarë ndodh me korrupsionin në vendin e tij. Ka ardhur koha që politikanët të fillojnë ta dëgjojnë”, u shpreh ai.
