Ambasadorët e Quint-it (pesë vendet kryesore perëndimore) kanë refuzuar të marrin pjesë në bisedimet mes LDK-së dhe Vetëvendosjes për formimin e qeverisë së re, në Kosovë.
Me anë të një deklarate për mediat, ambasadorët theksojnë se nuk do të ndërmjetësojnë. “Ne përfaqësojmë shtetet që janë thellësisht të përkushtuara ndaj Kosovës demokratike dhe të pavarur. Çdo sugjerim se qeveritë tona përkrahin ndonjë parti apo kandidat të veçantë në zgjedhje është i pasaktë… përgjegjësia për të ardhmen e Kosovës, për udhëheqësit e Kosovës, dhe për vetë Kosovën, është vetëm e juaja, e popullit të Kosovës. Ne nuk do të ndërmjetësojmë. Ne i inkurajojmë të gjithë aktorët politikë në Kosovë që të përqendrohen në aspiratat e popullit të Kosovës”, thuhet në deklaratën e ambasadës së Francës, Gjermanisë, Britanisë së Madhe, Italisë dhe Shteteve të Bashkuara të Amerikës.
Kjo deklaratë e Quint-it erdhi pas paralajmërimit të Lëvizjes Vetëvendosje se gjatë ditës së sotme bashkë me LDK-në do të zhvillojnë takim në prezencë të ambasadorëve.
Më 20 janar Albin Kurti mori mandatin nga presidenti i Kosovës, Hashim Thaçi, për formimin e qeverisë dhe nga ajo ditë ka filluar afati prej 15 ditësh për një gjë të tillë.
Të dyja partitë politike po negociojnë me muaj, por pa ndonjë rezultat deri më tash. Ato vazhdojnë të jenë të ndara rreth postit të kryetarit të parlamentit të Kosovës, i cili tashmë mbahet nga lëvizja Vetëvendosje, ndonëse përgjatë gjithë negociatave që nga zgjedhjet e 6 tetorit është thënë se ky post i takon Lidhjes Demokratike./ Opinion.al
