Ambasada amerikane në Kosovë ka mirëpritur konstituimin e Kuvendit të Kosovës dhe ka përgëzuar kryeparlamentarin, Glauk Konjufca, ashtu sikurse anëtarët e tjerë të Kuvendit teksa ka apeluar për krijimin e qeverisë së re.
“Ne inkurajojmë liderët politikë që të formojnë një qeveri të re menjëherë, e cila është e përkushtuar për të përmbushur mandatin e votuesve. Ne presim që të punojmë me qeverinë e re, në çështjet e lidhura me paqen, drejtësinë dhe mirëqenien”, thuhet mes të tjerash në deklaratën e ambasadës.
Në seancën konstituive është zgjedhur kryetar i Kuvendit të Kosovës, Glauk Konjufca nga Lëvizja Vetëvendosje si dhe nënkryetarët, Arbërie Nagavcin nga Lëvizja Vetëvendosje, Kujtim Shalën nga Lidhja Demokratike e Kosovës dhe Memli Krasniqin nga Partia Demokratike e Kosovës. Gjithashtu janë zgjedhur Sllavko Simiq nga Lista Serbe dhe Fikrim Damka nga komuniteti turk.
Edhe presidenti i Kosovës, Hashim Thaçi ka uruar zgjedhjen e kryetarit dhe pesë nënkryetarëve, ka përfunduar procedura e konstituimit të Kuvendit të Kosovës.
Në një postim në rrjetin social, Facebook, Thaçi shkroi se Kosova ka përpara sfida të shumta që sipas tij kërkojnë nivel të lartë të përgjegjësisë.
“Prandaj të gjithë të zgjedhurit e popullit duhet t’i lënë anash interesat politike dhe të punojnë për krijimin sa më të shpejtë të institucioneve të Republikës së Kosovës”, ka thënë mes të tjerash Thaçi./Opinion.al
