Ambasada Amerikane në Tiranë ka uruar 45 magjistratë të rinj, të cilët i janë bashkuar gjykatave dhe prokurorive këtë javë.
Në një postim në rrjetin social “Facebook”, ambasada i bën apel magjistratëve që të tregojnë paanshmëri në çdo hap të rrugës së tyre ndërsa shton se Reforma në Drejtësi është kyç për të çuar më tej integrimin e Shqipërisë.
“Urime 45 magjistratëve e rinj të cilët ju bashkuan gjykatave dhe prokurorive këtë javë. Qytetarët shqiptarë presin që ju të jeni gjyqtarët dhe prokurorët me nivelin më të lartë të integritetit dhe profesionalizmit, duke treguar kurajon për të qenë të pavarur dhe të paanshëm në çdo hap të rrugës tuaj.
Ne mbështesim Këshillat dhe Shkollën e Magjistraturës në punën e tyre për plotësimin në kohë të vendeve vakante, në mënyrë që drejtësia të vendoset sa më shpejt të jetë e mundur. Reforma në drejtësi po përparon dhe zbatimi i suksesshëm i saj mbetet kyç për të çuar më tej integrimin e Shqipërisë në BE”,-shkruhet në reagimin e ambasadës.
