Partia Demokratike e Enkelejd Alibeaj ka konfirmuar se në Bashkinë e Tiranës do të futet me një kandidat të sajin në zgjedhjet e 14 Majit dhe ai është Roland Bejko. Bejko arriti të merrte shumicën e votave në mbledhjen e Kryesisë, duke triumfuar përballë Jonila Godoles. Kjo e fundit pritet të kryesojë listën për Këshillat Bashkiak të kryeqytetit, megjithatë nuk ka një vendimmarrje përfundimtare nga ana e Kryesisë. Kështu, me këtë vendim, konfirmohet se demokratët do të jenë të përçarë në 14 maj. Kjo sepse Bejko vjen si kandidat i Alibeajt dhe do të ketë përballë Belind Këlliçin, emër i dalë nga koalicioni Berisha-Meta si dhe Erion Veliajn e Partisë Socialiste.
Në mbledhjen e sotme përveç Roland Bejkos në Tiranë, Kryesia e PD vendosi që të konfirmojë pjesëmarrje në zgjedhjet vendore të kandidativë në 15 bashki nga 17 të tilla ku ishin prezantuar më herët kandidatë, ku spikat Lezha me Sandër Markun, Agron Kapllanaj në Mallakastër, Gjergji Gjata në Bashkinë e Korçës ndërsa në Fier do të garohet me Eriselda Zotaj Çelaj. Ndërkohë që për bashkitë e Kurbinit dhe Vaut të Dejës Kryesia e Partisë Demokratike ka vendosur zyrtarisht të mos ketë kandidatë, duke plotësuar kështu kërkesat e degëve për të mbështetetur vetëm kandidatët e ‘Primareve’, të mbështetura nga koalicioni Meta-Berisha.
Mesnata e ditës së nesërme është afati i fundit për regjistrimin në Komisionin Qendror të Zgjedhjeve të kandidatëve për kryebashkiakë dhe këshilltarë, por Partia Demokratike është në limitet e kohës dhe ende s’ka një vendim se çdo të ndodhë në shumicën e bashkive në vend. Deri është vendosur garimi vetëm në disa bashki, ku më kryesorja është ajo e Tiranës. Nesër pritet të konkludohet për të gjitha bashkitë e tjera.
