Vendimi i Elvis Roshit për tu rikthyer në detyrë si kryebashkiak i Kavajës pas publikimit të disa dokumenteve se ai kishte dëshmi të pastër penaliteti në Itali, PD i ka kërkuar sot kryeministrit Rama që të qartësojë qëndrimin e tij.
Duke iu rikujtuar kryeministrit deklaratën që ai bëri pas postimit të Elvis Roshit për vendimin e dënimit nga gjykata italiane, kreu i Departamentit të Rendit dhe Sigurisë, Enkelejd Alibeaj kërkoi një shpjegim nga Rama.
“Edi Rama një ditë thotë që dekriminalizimi funksionon, por të nesërmen thotë se nuk e njeh dekriminalizimin. Cilin Edi Ramë duhet të besojnë qytetarët, atë që thotë shërbimi i Rroshit përfundoi, apo atë që thotë Rroshi të rikthehet në detyrë. Ky është një problem më i madh, nuk është lojë kungulleshash. Ka të bëjë me ligjin, me të vetmen reformë të suksesshme në këto 3 vite që është dekriminalizimi. E pyesim sot publikisht Edi Ramën. A i qëndron deklaratës së 31 majit, ku ka shpallur të përfunduar shërbimin e Rroshit? Apo i qëndron deklaratës së 3 qershorit ku ka njoftuar rikthimin e Roshit? Ta thotë publikisht, është me dekriminalizimin, apo me krimin? Sa më shumë vonon shkarkimin e Rroshit dhe dorëzimin e tij para drejtësisë, aq më shumë i bind qytetarët se zgjedhja e tij është e palëkundur, se zgjedhja e tij është krimi, inkriminimi, trafikantët, tutorët, vrasësit.”, tha Alibeaj.
