Deputeti i Partisë Demokratike, Enkelejd Alibeaj, është shprehur në Komisionin e Mandateve ku po shqyrtohet heqja e imunitetit të deputetit socialist Saimir Tahiri, i akuzuar për trafik droge se po ndërhyet në punët dhe hetimet e Prokurorisë.
Alibeaj theksoi se e kupton seriozitetin e Prokurorisë dhe i jep të drejtë. Kjo është një kërkesë e drejtë nga pikëpamja e prokurorisë.
“Kur të prezantohet dokmenti sekret seanca të jetë e mbyllur, ose në fund kur të diskutojmë materialet sekret seanca të jetë e mbyllur. Por jemi në kushtet kur publiku do të dijë. Ky ishte propozimi ynë“, tha ai.
Deputeti demokrat i kërkoi anëtarëve socialist të komisionit të mos ndërhyjnë në punë dhe hetimet e Prokurorisë.
Këshilli i Mandateve dhe Rregulloreve është mbledhur këtë paradite për kërkesën e Prokurorisë së Krimeve të Rënda për heqjen e imunitetit të Saimir Tahirit dhe dhënien e autorizimit për arrestimin e tij.
Vetë ish-ministri i Brendshëm është i pranishëm në këtë mbledhje, por do të jetë avokati i tij Artan Hadaraj që do të flasë për të. Ndërsa organi i akuzës është përfaqësuar nga kreu i Prokurorisë së Krimeve të Rënda, Besnik Hajdarmataj.
