Partia Demokratike ka akuzuar sot qeverinë dhe ministrin Saimir Tahiri se tradhtoi policinë greke në lidhje me çështjen e hetimit të trafikut të drogës dhe arratinë e ‘Escobarit të Ballkanit’, Kelmend Balili. Në një dalje publike para mediave, kreu i Departamentit të Rendit dhe Sigurisë, Enkelejd Alibeaj pohoi se prej 10 ditësh baroni i drogës ndodhet në arrati.
“Sot u bënë 10 ditë nga arratisja e drejtorit rajonal të Edi Ramës, Klement Balili, i akuzuar për trafik ndërkombëtar narkotikësh. Eskobari i Ballkanit, siç e quajti CNN, arriti ti shpëtonte aksionit të organizuar nga disa shtete të Europës përfshirë dhe DEA-n amerikane. 10 ditët e arratisjes së tij, janë 10 ditë që na kujtojnë lidhjen e Balilit me Ramën dhe Tahirin. Janë 10 ditë që dëshmojnë sabotimin dhe tradhtinë që Saimir Tahiri u bëri policisë greke, belge e DEA-s amerikane, duke i dhënë Balilit mundësi për ti shpëtuar drejtësisë. Policitë e vendeve të BE dhe DEA e dinin mirë se Balili kishte lidhje të forta me qeverinë dhe ministrin tonë të brendshëm, ndaj dhe i kishin përjashtuar nga aksioni ndërkombëtar.”, citohet në reagimin e Alibeajt.
Më tej PD ka akuzuar Tahirin se mbikëqyrte aksionin ndërkomëbëtar për të mbrojtur Balilin. “Këtë e tregon qartë dhe deklarata e Europol e datës 13 maj, 2016. Megjithatë, në vend që të mbikëqyrte Balilajn, Tahiri mesa duket mbikëqyrte aksionin ndërkombëtar dhe kështu kur partnerët iu afruan trafikantit, drejtorit rajonal të Edi Ramës, ministri i brendshëm i dha ndihmën e nevojshme për tu arratisur. Një fushë ku tashmë Tahiri dhe Rama kanë përvojë të pasur, siç bënë dhe me Frrokun, të dënuar me burgim të përjetshëm për vrasjen e komisarit. Çdo ditë në arrati e Balilit, është një akuzë më shumë për Tahirin e Ramën. Çdo ditë në detyrë e Tahirit, është një ditë më shumë në pushtet e krimit, e bandave e trafikantëve të drogës.”, përfundon deklarata.
