Deputeti socialist dhe gazetari Alfred Peza u njoh sot zyrtarisht me akuzat që rëndojnë ndaj tij për fshehje pasurie, dhe pastrim parash. Ai ishte sot në organin e akuzës i shoqëruar nga avokati mbrojtës Ardian Visha, ndërsa prokurore e çështjes është Rovena Gashi.
Peza nuk pranoi të flasë për mediat kur doli nga dyert e prokurorisë, ndërsa avokati ishte entuziast se mund ta fitojë lehtë këtë çështje. “Çdo avokat do ta dëshironte këtë çështje se pse është garant i fituar”, tha ai. Sipas Vishës, prokuroria e ka ndërtuar keq këtë dosje, nuk ka fakte- tha ai -kundër Pezës.
Prokurorja Rovena Gashi nga ana tjetër i ka komunikuar vendimin e marrjes si të pandehur dhe dërgimin e dosjes në ngarkim të tij pranë Gjykatës së Lartë ku edhe do të gjykohet deputeti Peza.
Ndërkohë nga procedimi penal është përjashtuar bashkëshortja e deputetit, e cila fillimisht u dyshua si bashkpëunëtore.
Para hetuesve, mësohet se Peza nuk e ka pranuar akuzën duke pretenduar se është i pafajshëm. Ndërsa në dalje të institucionit të akuzës, foli vetëm avokati mbrojtës, i cili pretendoi se akuzat nuk qëndrojnë dhe do të dalë fitimtar gjatë procesit gjyqësor.
Sipas prokurorisë, është kryer akt-ekspertimi kontabël i të ardhurave të deputetit Peza dhe bashkëshortes ndër vite. Nga verifikimi i tyre, thuhet nga prokuroria, nuk rakordohen të ardhurat e deklaruara zyrtarisht me parat që kishte në gjendje deputeti Peza.
Në akt-ekspertimin kontabël, ku edhe është bazuar ngritja e akuzave, ndër të tjera thuhet se deputeti nuk justifikon rreth 800 milionë lekë të cilat i disponon në formën e aksioneve të blear në një bankë të nivelit të dytë në vend.
Hetimi për këtë çështje e ka nis me inciativë të saj prokuroria, pas publikimit në media të disa të dhënave, që deputeti kishte blerë me rreth 1.1 mlrd lekë aksione në nja bankë të nivelit të dytë.
Nga ana tjetër, kërkesën e prokurorisë për sekuestrimin e aksioneve të deputeti Peza dhe bashkëshortes së tij, Gjykata e Lartë më herët e ka rrëzuar duke e cilësuar si të paargumentuar ligjërisht.
