Në rubrikën “Ka një mesazh për ty” në “E diela Shqiptare” në Tv Klan ka shkruar Xhoana nga Lezha, motra e Aleksandrit, i cili është personazhi që iu bë surpriza. Aleksandri ka lindur me aftësi ndryshe, pasi krahët dhe këmbët e tij nuk janë zhvilluar në proporcion me trupin. Motra e tij Xhoana, tregoi historinë e tij, paragjykimet me të cilat përballet ai si dhe dëshirën për të vazhduar studimet. Ne studio ishte gjithashtu dhe Bardhok Pulaj, Drejtor i Drejtorisë Arsimore të Lezhës.
Xhoana : Vëllai ka qenë 13 vjeç kur unë kam lindur dhe ka qenë personi i parë që është kujdesur për mua, sikur një nënë. Më ka ushqyer, lidhur dhe zgjidhur në djep, më ka mësuar të hedh hapat e parë. Gjithashtu ai më ka çuar dhe në shkollë. Kur rrëzohesha më thoshte mos u mërzit se plaga jote do të shërohet shumë shpejt. Ai ka qenë një person shumë i ndrojtur. Para se të vdiste babai i ka thënë që duhet të bënte një shkollë si të gjithë shokët e tjerë, por paragjykohej nga njerëzit.
