PRISHTINE- Në kryeqytetin e Kosovës është duke u zhvilluar gjyqi ndaj deputetëve të opozitës, për dhunën e shkaktuar nga ta në Kuvendin e Kosovës.
Albulena Haxhiu, Donika Kadaj- Bujupi dhe Faton Topalli janë paraqitur në seancë, raportojnë mediat vendase. Albin Kurti mungoi. Gjyqtari është shprehur se herën tjetër do të merret me forcë.
Në seancë e sotme do të shqyrtohej aktakuza ndaj tyre për hedhje të gazit lotsjellës në seancë të Kuvendit të Kosovës, vitin e kaluar. Por seanca nuk është mbajtur shkaku i mungesës së deputetit tjetër opozitar, Albin Kurti.
Haxhiu, Kadaj- Bujupi dhe Topalli nuk kanë pritur gjatë për t’u paraqitur Kurti por janë larguar nga salla me arsyetimin se kanë punë tjera për të bërë. “Ne kemi shumë përgatitje për 17 shkurt dhe s’kemi kohë për të humbur”, tha Donika Kadaj.
“Ata që e kanë thirrur seancën nuk ishin aty për më shumë se 15 minuta”, tha ajo duke aluduar për gjyqtarin, Beqir Kalludra i cili nuk u paraqit fare në sallë të gjykatës, në pritje të ardhjes së Albin Kurtit.
Më 16 dhjetor të vitit të kaluar, Prokuroria Themelore e Prishtinës kishte ngritur aktakuzë ndaj Albin Kurtit, Albulena Haxhiut, Donika Kadaj-Bujupit dhe Faton Topallit për hedhje të gazit lotsjellës brenda sallës së Kuvendit.
