Kryeministri i Kosovës, Albin Kurti ka deklaruar se Serbia nuk i është përgjigjur me vullnet të mirë vendimit të qeverisë së tij për heqjen e pjesshme të tarifës për lëndën e parë që importohet nga Serbia.
Madje ai shkruan se Serbia ka intensifikuar fushatën e çnjohjeve të pavarësisë së Kosovës.
“Vullnetit tim të mirë, për heqjen e pjesshme të tarifës në lëndën e parë që importohet nga Serbia, në mënyrë që të krijohen kushtet për rifillim të dialogut dhe të ndërtimit të marrëdhënieve konstruktive të bashkëpunimit, qeveria serbe po i përgjigjet me intensifikim të fushatës së çnjohjeve së pavarësisë së Kosovës”.
Me anë të një statusi në Facebook, Kurti i bën thirrje autoriteteve shtetërore serbe dhe faktorëve ndërkombëtarë që të marrin masat për të ndalur politikën armiqësore ndaj Kosovës.
“I bëj thirrje Serbisë zyrtare që ta ndalë këtë ofensivë dhe të heqë dorë nga politikat destruktive ndaj Kosovës dhe shtetësisë së saj. Po ashtu, do të kërkoj nga faktorët relevantë ndërkombëtarë, në radhë të parë ShBA-të dhe BE-ja, si ndërmjetësues në procesin e dialogut, ta shtojnë trysninë mbi Serbinë që ta ndërpresë politikën armiqësore ndaj Kosovës”, shton ai.
Kryeminstri Kurti paralajmëron gjithashtu se do të rishqyrtojë vendimin e tij për heqjen e tarifave pasi nuk mund të lejojë që vullneti i mirë i Kosovës të nëpërkëmbet.
“Ne kemi treguar qartë se e kemi vullnetin për marrëdhënie korrekte e normale me Serbinë. Mirëpo nuk mund të lejojmë që ky vullnet i yni të nëpërkëmbet. Si kryeministër i Kosovës do të shqyrtoj me kujdes situatën e krijuar dhe do të veproj konform interesave të Republikës dhe qytetarëve të saj”, shkruan Kurti. /Opinion.al
